റിയാദ്: സഊദിയിൽ ലുലു ഹൈപ്പർ മാർക്കറ്റുകൾ കൊവിഡ്-19 വൈറസ് ബാധയെ തുടർന്ന് അടച്ചുവെന്ന തരത്തിൽ പ്രചരിക്കുന്നത് വ്യാജ വാർത്തയാണെന്ന് ലുലു ഗ്രൂപ്പ്. ജീവനക്കാരിൽ വൈറസ് ബാധ കണ്ടെത്തിയതിനെ തുടർന്ന് രാജ്യത്തെ ലുലു ഹൈപ്പർ മാർക്കറ്റുകൾ അടച്ചു പൂട്ടുന്നതായാലുള്ള വാർത്തയാണ് സാമൂഹിക മാധ്യമങ്ങളിൽ പ്രചരിച്ചിരുന്നത്. ഇതുൾപ്പെടുന്ന മെയിൽ വാർത്തയുടെ സ്‌ക്രീൻ ഷോർട്ടാണ് വ്യാപകമായി പ്രചരിച്ചിരുന്നത്. സഊദിയിൽ ആദ്യ കൊവിഡ് കേസ് റിപ്പോര്‍ട്ട് ചെയ്തതു മുതല്‍ തുടക്കത്തില്‍ തന്നെ ആരോഗ്യ മന്ത്രാലയത്തിന്‍റെ ചട്ടപ്രകാരമുള്ള കൊവിഡ് പ്രതിരോധ നടപടി സ്വീകരിച്ചാണ് ലുലു ഗ്രൂപ്പിന്‍റെ എല്ലാ മാളുകളും പ്രവര്‍ത്തിക്കുന്നത്.

    ജീവനക്കാര്‍ക്കും ഹൈപ്പര്‍മാര്‍ക്കറ്റുകളിലും എത്തുന്നവര്‍ക്കും ആരോഗ്യ മന്ത്രാലയത്തിന്‍റെ ചട്ടമനുസരിച്ചുള്ള സംവിധാനങ്ങള്‍ ലുലുവില്‍ നല്‍കുന്നുണ്ട്. ആർക്കെങ്കിലും ലക്ഷണങ്ങൾ കണ്ടെത്തിയാൽ അവരെ വൈദ്യ പരിശോധനക്കും ക്വാറന്റൈനും വിധേയമാക്കും. സഊദി ഗവണ്മെന്റിന്റെ എല്ലാ വ്യവസ്ഥകളും കർശനമായി പാലിക്കുന്നുണ്ടെന്നും കമ്പനിയധികൃതർ അറിയിച്ചു.