ലക്‌നൗ: ഉത്തര്‍പ്രദേശില്‍ ക്ഷേത്രത്തിനകത്ത് വച്ച് രണ്ട് സന്യാസിമാരെ തല്ലി കൊലപ്പെടുത്തി. ജഗദീഷ്(രന്ഗി ദാസ്-55), ഷേര്‍ സിങ്(35) എന്നീ സന്യാസിമാരെയാണ് ദലിതനായ രാജു(മുരാരി) എന്നയാള്‍ കൊലപ്പെടുത്തിയത്.
പ്രതിയെ പൊലിസ് അറസ്റ്റ് ചെയ്തു. കൊലയാളിയും കൊല്ലപ്പെട്ടവരും ഒരേ മതക്കാരാണെന്ന് വ്യക്തമാക്കാനാണ് ജാതി വെളിപ്പെടുത്തിയതെന്ന് ബുലന്ദ്ഷഹര്‍ എസ്.എസ്.പി സന്തോഷ് കുമാര്‍ സിങ് പറഞ്ഞു. കൊല നടത്തുമ്പോള്‍ ഇയാള്‍ കഞ്ചാവ് ഉപയോഗിച്ചിരുന്നെന്ന് പൊലിസ് പറഞ്ഞു. രണ്ടുദിവസം മുന്‍പ് പ്രതി ക്ഷേത്രത്തില്‍ നിന്ന് ഒരു സംഗീത ഉപകരണം മോഷ്ടിച്ചത് സന്യാസിമാര്‍ ചോദ്യംചെയ്തിരുന്നു.
ഇതിന്റെ ദേഷ്യത്തിലാണോ കൊല നടത്തിയതെന്ന് പൊലിസ് സംശയിക്കുന്നുണ്ട്. ബുലന്ദ്ഷഹര്‍ ജില്ലയിലെ പഗോന ഗ്രാമത്തിലാണ് സംഭവം നടന്നത്.
തിങ്കളാഴ്ച്ച രാത്രി ക്ഷേത്രത്തില്‍ കയറിയ രാജു സന്യാസിമാരെ വടികൊണ്ട് അടിച്ച് കൊല്ലുകയായിരുന്നുവെന്നാണ് പൊലിസ് പറയുന്നത്. കൊലപാതകത്തില്‍ വര്‍ഗീയമായി ഒന്നുമില്ലെന്ന് ഉത്തര്‍പ്രദേശ് പൊലിസ് പ്രതികരിച്ചു.
പുലര്‍ച്ചെ ക്ഷേത്രത്തിലെത്തിയവരാണ് രണ്ട് സന്യാസിമാരും കൊല്ലപ്പെട്ടതായി കണ്ടത്. പ്രതി സംഭവസ്ഥലത്തിന് രണ്ട് കി.മീ അകലെ ഉന്മാദാവസ്ഥയിലായിരുന്നുവെന്ന് പൊലിസ് പറഞ്ഞു. ഇയാളെ നാട്ടുകാര്‍ കൈകാര്യം ചെയ്ത ശേഷമാണ് പൊലിസിന് കൈമാറിയത്.
മഹാരാഷ്ട്രയിലെ പാല്‍ഘറില്‍ രണ്ടുസന്യാസിമാരെ ജനക്കൂട്ടം കൊലപ്പെടുത്തിയ ശേഷം സന്യാസിമാര്‍ക്ക് നേരെ നടന്ന അക്രമത്തെ വര്‍ഗീയവല്‍ക്കരിക്കാന്‍ ശ്രമങ്ങള്‍ നടക്കുമെന്നും ഇതിനെ ചെറുത്ത് തോല്‍പിക്കണമെന്നും ശിവസേന ഉള്‍പ്പെടെ വിവിധ രാഷ്ട്രീയ കക്ഷികള്‍ ആവശ്യപ്പെട്ടു.
സംഭവത്തില്‍ കടുത്ത നടപടിയെടുക്കാന്‍ പൊലിസിന് നിര്‍ദേശം നല്‍കിയതായി യു.പി മുഖ്യമന്ത്രി യോഗി ആദിത്യനാഥ് തന്നെ വിളിച്ച മഹാരാഷ്ട്ര മുഖ്യമന്ത്രി ഉദ്ധവ് താക്കറെയെ അറിയിച്ചു.
വിഷയത്തെ രാഷ്ട്രീയവല്‍ക്കരിക്കാന്‍ ശ്രമം ഉണ്ടാകരുതെന്നും കുറ്റക്കാരനെതിരേ കര്‍ശന നടപടി സ്വീകരിക്കണമെന്നും കോണ്‍ഗ്രസ് നേതാവ് പ്രിയങ്കാ ഗാന്ധി ആവശ്യപ്പെട്ടു.