ന്യൂഡല്‍ഹി: പി.വി സിന്ധുവിന് വനിതാ ബാഡ്മിന്റണ്‍ റാങ്കിങില്‍ കുതിപ്പ്. പുതിയ റാങ്കിങില്‍ രണ്ടാംസ്ഥാനത്താണ് സിന്ധു. അടുത്തിടെ നടത്തിയ മികച്ച പ്രകടനങ്ങളാണ് താരത്തിന് ഗുണകരമായത്. കഴിഞ്ഞ ദിവസം ഇന്ത്യന്‍ ഓപണ്‍ സൂപ്പര്‍ സിരീസിന്റെ ഫൈനലില്‍ കരോലിന മരിനെ പരാജയപ്പെടുത്തിയിരുന്നു.
ലോക ബാഡ്മിന്റണ്‍ ഫെഡറേഷന്റെ റാങ്കിങില്‍ മൂന്നു സ്ഥാനങ്ങള്‍ മെച്ചപ്പെടുത്തിയാണ് സിന്ധു രണ്ടാം സ്ഥാനത്തേക്കുയര്‍ന്നത്. മരിനെയടക്കം പിന്തള്ളിയാണ് സിന്ധു കുതിപ്പ് നടത്തിയത്. ചൈനീസ് തായ്‌പേയുടെ തായ് സു യിങാണ് ഒന്നാം സ്ഥാനത്ത്. 2016ല്‍ ഒളിംപിക്‌സ് വെള്ളി മെഡല്‍ കൂടാതെ മലേഷ്യന്‍ മാസ്റ്റേഴ്‌സ് കിരീടവും ചൈന ഓപണും സിന്ധു നേടിയിരുന്നു. സിന്ധുവിന് മുന്‍പ് സൈന നേഹ്‌വാളാണ് ഈ റാങ്ക് സ്വന്തമാക്കിയ ഇന്ത്യന്‍ താരം. 2015ല്‍ സൈന ഒന്നാം റാങ്കിലെത്തുകയും ചെയ്തിരുന്നു.