തിരുവനന്തപുരം: സംസ്ഥാന ഭരണ സിരാകേന്ദ്രമായ സെക്രട്ടേറിയറ്റും സുരക്ഷാഭീഷണിയില്‍. മുഖ്യമന്ത്രി മുതലുള്ള ഭരണകര്‍ത്താക്കളും നാലായിരത്തോളം ഉദ്യോഗസ്ഥരും ആയിരക്കണക്കിന് സന്ദര്‍ശകരുമുള്ള സെക്രട്ടേറിയറ്റില്‍ ഏതെങ്കിലും കാരണവശാല്‍ തീപിടിത്തമുണ്ടായാല്‍ രക്ഷാപ്രവര്‍ത്തനംപോലും ബുദ്ധിമുട്ടാണെന്നാണു 2015ല്‍ ജേക്കബ് തോമസ് മേധാവിയായിരുന്നപ്പോള്‍ നല്‍കിയ റിപ്പോര്‍ട്ടില്‍ പറയുന്നത്.

തീപിടിത്തമുണ്ടായാല്‍ അതിവേഗം പടര്‍ന്നുപിടിക്കാന്‍ ഇടവരുത്തുന്ന അശാസ്ത്രീയ നിര്‍മാണമാണ് ഇവിടെയുള്ളത്. പല മുറികളിലും വേണ്ടത്ര വായുസഞ്ചാരമില്ല. തീപിടിത്തമുണ്ടായാല്‍ രക്ഷപ്പെടാനും രക്ഷാമാര്‍ഗങ്ങളെക്കുറിച്ചുമുള്ള മുന്നറിയിപ്പുകള്‍ എല്ലായിടത്തും പ്രദര്‍ശിപ്പിക്കണമെന്നതടക്കമുള്ള നിബന്ധനകളും ഇവിടെ പാലിച്ചിട്ടില്ല. തീയണയ്ക്കാനുള്ള ഉപകരണങ്ങളും പേരിനു മാത്രമാണ്.

വെള്ളം എത്തിക്കുന്ന ഫയര്‍ ഹൈഡ്രന്റും സെക്രട്ടേറിയറ്റിലെ കെട്ടിടങ്ങള്‍ക്ക് സമീപമില്ല. കൃത്യമായി സുരക്ഷാ പരിശോധന നടത്തുകയോ സുരക്ഷിതമായി രക്ഷപ്പെടാനുള്ള പരിശീലനം ലഭ്യമാക്കാനുള്ള മോക് ഡ്രില്‍ കൃത്യമായ ഇടവേളകളില്‍ നടത്തുകയോ ചെയ്യുന്നില്ല.