ന്യൂഡല്‍ഹി: രാജ്യത്ത് കൊവിഡ് ബാധിച്ചവരുടെ എണ്ണം 31,000 കവിഞ്ഞു. മരണം ആയിരത്തിലേറെ ആയതായും റിപ്പോര്‍ട്ടുകള്‍ പറയുന്നു. 1007 പേരാണ് കൊവിഡ് ബാധിച്ച് മരിച്ചത്. 31,331 കേസുകള്‍ സ്ഥിരീകരിച്ചു. 7,695പേര്‍ക്ക് രോഗം ഭേദമായി.

ആരോഗ്യ പ്രവര്‍ത്തകര്‍ക്കും പൊലിസ് ഉദ്യോഗസ്ഥര്‍ക്കുമാണ് ഇപ്പോള്‍ കൂടുതലായി രോഗം സ്ഥിരീകരിക്കുന്നത്.

രാജ്യത്ത് ഏറ്റവും കൂടുതല്‍ കേസുകളുള്ള മഹാരാഷ്ട്രയില്‍ കഴിഞ്ഞ 24 മണിക്കൂറിനുള്ളില്‍ 729 പേര്‍ക്ക് രോഗവും 31 മരണവും സ്ഥിരീകരിച്ചു. ഇവിടെ ആകെ കൊവിഡ് കേസുകള്‍ 9318 ഉം മരണം 400 ആയി. മുംബൈയില്‍ 393 പേര്‍ക്ക് കൂടി രോഗം സ്ഥിരീകരിച്ചു. 25 മരണവും റിപ്പോര്‍ട്ട് ചെയ്തു. ഇവിടെ രോഗബാധിതരുടെ എണ്ണം 5982 ആയി.

ധാരാവിയില്‍ ഇന്ന് നാല് മരണവും 42 കൊവിഡ് കേസും സ്ഥിരീകരിച്ചു. ആകെ രോഗികള്‍ ഇവിടെ 330 ഉം മരണം 18 ആയി. പൂനെ മൂന്ന് മരണവും 143 കേസും റിപ്പോര്‍ട്ട് ചെയ്തു. മഹാരാഷ്ട്രയിലെ നാഗ്പൂരില്‍ 80 പേര്‍ പോസിറ്റീവ് ആയതോടെ 750 പേരെ നിരീക്ഷണത്തിലക്കി. 500 പേരെ കൂടി നിരീക്ഷണത്തില്‍ ആക്കുമെന്ന് നാഗ്പൂര്‍ മുനിസിപ്പല്‍ കോര്‍പറേഷന്‍ അറിയിച്ചു

രോഗം ബാധിച്ചവരുടെ കോണ്‍ടാക്ട് ലിസ്റ്റ് പൂര്‍ണമായും കണ്ടെത്താനായില്ലെന്നും അധികൃതര്‍ വ്യക്തമാക്കി. നിയന്ത്രിത മേഖലകളുടെ എണ്ണം 1036 ആയി. മഹാരാഷ്ട്ര സെക്കട്ടേറിയറ്റിലെ നാല് ജീവനക്കാര്‍ക്കും കൊവിഡ് സ്ഥിരീകരിച്ചു. സംസ്ഥാനത്തെ മരണ നിരക്ക് 4.30 ശതമാനം ആയി.

രാജസ്ഥാനില്‍ 102 കേസും രണ്ട് മരണവും സ്ഥിരീകരിച്ചു. പശ്ചിമ ബംഗാളില്‍ 28 പുതിയ കൊവിഡ് കേസ് റിപ്പോര്‍ട്ട് ചെയ്തു. ഒഡീഷയില്‍ 7 പേര്‍ക്ക് കൂടി രോഗം കണ്ടെത്തിയതോടെ ആകെ രോഗികളുടെ എണ്ണം 118 ആയി. ഒരു മരണവും റിപ്പോര്‍ട്ട് ചെയ്തു. ഗുജറാത്തില്‍ രോഗ ബാധിതരുടെ എണ്ണം 3774 ആയി മരണം 181 കടന്നു. മധ്യ പ്രദേശില്‍ രോഗം സ്ഥിരീകരിച്ചവര്‍ 2387 ഉം മരണ സഖ്യ 120 ആണ്.