കൊട്ടാരക്കര: ദേശീയപാതയില്‍ നെടുവത്തൂര്‍ താമരശ്ശേരി മുക്കില്‍ ടെമ്പോയും കാറും കൂട്ടിയിടിച്ചുണ്ടായ അപകടത്തില്‍ ചെണ്ടമേളം കലാകാരനായ യുവാവ് മരിച്ചു. അപകടത്തില്‍ ആറു പേര്‍ക്ക് പരുക്കേറ്റിട്ടുണ്ട്. ഇതില്‍ നാലു പേരുടെ നില ഗുരതരമാണ്. നെടുവത്തൂര്‍ നീലേശ്വരം കുറ്റിവിള കോളനിയ്ക്കു സമീപം പാപ്പനാട്ട് വീട്ടില്‍ പരേതനായ നകുലന്റേയും  ലതികയുടേയും ഏകമകന്‍ നന്ദു(20) ആണ് മരിച്ചത്. അവധി ദിവസങ്ങളില്‍ ചെണ്ടമേളത്തിന് പോയിരുന്ന നന്ദു അടൂര്‍ കിളിവയല്‍ സെന്റ് സിറില്‍ കോളജിലെ രണ്ടാം വര്‍ഷ ബിരുദ വിദ്യാര്‍ഥിയാണ്.
ഉത്സവമേളം കഴിഞ്ഞു മടങ്ങുകയായിരുന്ന ആനക്കോട്ടൂര്‍ പ്രണവം ആര്‍ട്‌സിലെ  കലാകാരന്‍മാര്‍ സഞ്ചരിച്ചിരുന്ന ടെമ്പോവാന്‍ എതിര്‍ ദിശയില്‍ വന്ന കാറുമായി കൂട്ടിയിടിച്ചാണ് അപകടം ഉണ്ടായത്. ഇടിയുടെ ആഘാതത്തില്‍ വാതിലില്‍ നിന്നും തെറിച്ചു റോഡില്‍ വീണ നന്ദുവിന്റെ മുകളിലേക്ക് ടെമ്പോ വാന്‍ മറിയുകയായിരുന്നു. നന്ദു സംഭവസ്ഥലത്തുവച്ചു തന്നെ മരിച്ചു. ഗുരുതരമായി പരുക്കേറ്റ ഗ്രൂപ്പ് അംഗങ്ങളായ പുല്ലാമല സ്വദേശി കണ്ണനെ(25) തിരുവനന്തപുരം മെഡിക്കല്‍ കോളജിലും, ആനക്കോട്ടൂര്‍ സ്വദേശികളായ വിഷ്ണു (25), അഭിലാഷ് (32) എന്നിവരെ മിയ്യണ്ണൂര്‍ സ്വകാര്യ മെഡിക്കല്‍ കോളജിലും പ്രവേശിപ്പിച്ചു. പൊലിക്കോട് സ്വദേശി കണ്ണന്‍ (35) ആനക്കോട്ടൂര്‍ സ്വദേശി അഖില്‍ (25) എന്നിവര്‍ കൊട്ടാരക്കര താലൂക്ക് ആശുപത്രിയില്‍ ചികിത്സയിലാണ്. കാര്‍ ഓടിച്ചിരുന്ന കോട്ടാത്തല  പണയില്‍ പാട്ടത്തില്‍ വീട്ടില്‍ ബ്രഹ്മാനന്ദന്റെ മകന്‍ അരുണ്‍ (26) അപകടനില തരണം ചെയ്തിട്ടില്ല. ഇയാള്‍ തിരുവനന്തപുരത്ത് സ്വകാര്യ ആശുപത്രയില്‍ തീവ്ര പരിചരണ വിഭാഗത്തിലാണ്. സൈനികനായ ഇയാള്‍ രണ്ടു ദിവസം മുമ്പാണ് അവധിക്ക് നാട്ടില്‍ എത്തിയത്.