കൊട്ടാരക്കര: കാറില്‍ കടത്തിയ 150 കുപ്പി വിദേശമദ്യം എക്‌സൈസ് സംഘം പിടികൂടി. കാറിലുണ്ടായിരുന്ന ആല്‍ത്തറമൂട്ടില്‍ മണലില്‍ പടിഞ്ഞാറ്റേതില്‍ വീട്ടില്‍ രഞ്ജിത്ത്(36), പറങ്കിമാംവിള വീട്ടില്‍ സാജന്‍(41) എന്നിവരെ കസ്റ്റഡിയിലെടുത്തു. വാളകം ബിവറേജസ് ഔട്ട്‌ലറ്റില്‍ നിന്നും വാങ്ങിയ മദ്യമെന്നാണ് ഇവര്‍ നല്‍കിയ മൊഴി. എന്നാല്‍ ഇതിന്റെ ബില്ലോ രേഖകളോ ഇവരുടെ പക്കലുണ്ടായിരുന്നില്ല. ബിവറേജസ് ജീവനക്കാര്‍ക്ക് കൂടുതല്‍ പണം നല്‍കി മദ്യം കച്ചവടത്തിനായി വാങ്ങിയതാണെന്നാണ് എക്‌സൈസ് ഉദ്യോഗസ്ഥര്‍ പറയുന്നത്.
56.250 ലിറ്റര്‍ മദ്യമാണ് ഇവരുടെ പക്കലുണ്ടായിരുന്നത്. കൊട്ടാരക്കര എക്‌സൈസ് റേഞ്ച് ഇന്‍സ്പക്ടര്‍ പി.എസ്.സജികുമാര്‍, പ്രിവന്റീവ് ഓഫീസര്‍ കെ.എസ്.രാജേഷ്, അസി. ഇന്‍സ്പക്ടര്‍ ഇ.ഷറഫുദ്ദീന്‍ എന്നിവരുടെ നേതൃത്വത്തിലുള്ള സംഘമാണ് പിടിച്ചെടുത്തത്.3