ആറ്റിങ്ങല്‍: വീട്ടമ്മയെ  മര്‍ദിച്ച് പരുക്കേല്‍പ്പിച്ച യുവാവിനെ ആറ്റിങ്ങല്‍ പൊലിസ് പിടികൂടി. മങ്കാട്ടുമൂല സന്തോഷ് നിവാസില്‍ രാകേഷ്( 30) ആണ് അറസ്റ്റിലായത്.
ഇയാള്‍ ലഹരിക്ക് അടിമയാണെന്ന് പൊലിസ് പറഞ്ഞു. മദ്യലഹരിയിലായിരുന്ന യുവാവ് അയല്‍വാസിയായ വീട്ടമ്മയുമായി വഴക്കിടുകയും മര്‍ദിക്കുകയുമായിരുന്നു. ഇവര്‍ മെഡിക്കല്‍ കോളജ് ആശുപത്രിയില്‍ ചികിത്സയിലാണ്. കഴിഞ്ഞ ദിവസം വൈകുന്നേരം ആറു  മണിയോടെയായിരുന്നു സംഭവം.
ആറ്റിങ്ങല്‍ സി.ഐ. സുനില്‍കുമാറിന്റെ നിര്‍ദേശപ്രകാരം എസ്.ഐ മാരായ  തന്‍സീം, ജയേന്ദ്രന്‍ എന്നിവരുടെ നേതൃത്വത്തിലുള്ള സംഘമാണ് ഒളിവിലായിരുന്ന യുവാവിനെ പിടികൂടിയത്.