ന്യൂഡല്‍ഹി:  ലോക്ക് ഡൗണ്‍ മൂലം നടത്താന്‍ കഴിയാതെ പോയ പത്താംക്ലാസ്, പ്ലസ് ടു പരീക്ഷകള്‍ ലോക്ക് ഡൗണിന് ശേഷം നടത്തുമെന്ന് സി.ബി.എസ്.ഇ അറിയിച്ചു. പരീക്ഷയ്ക്ക് 10 ദിവസം മുന്‍പ് തന്നെ വിവരങ്ങള്‍ വിദ്യാര്‍ഥികളെ അറിയിക്കുമെന്നും സി.ബി.എസ്.ഇ വാര്‍ത്താക്കുറിപ്പില്‍ വ്യക്തമാക്കി. പരീക്ഷ സംബന്ധിച്ച് നിരവധി അഭ്യൂഹങ്ങള്‍ പ്രചരിച്ച പശ്ചാത്തലത്തിലാണ് സി.ബി.എസ്.ഇ നടപടി. 

ബാക്കിയുള്ള പരീക്ഷകളുടെ മാര്‍ക്ക് തുടര്‍ പഠനത്തിന് നിര്‍ണായകമാണ്. അതിനാല്‍ ലോക്ക് ഡൗണ്‍ തീര്‍ന്നാല്‍ ആദ്യ നടപടി പരീക്ഷ നടത്തുകയാകുമെന്നും സി.ബി.എസ്.ഇ അറിയിച്ചു. ലോക്ക് ഡൗണിന് ശേഷമുള്ള സാഹചര്യങ്ങള്‍ വിലയിരുത്തിയ ശേഷമായിരിക്കും പരീക്ഷാ തിയതി പ്രഖ്യാപിക്കുകയെന്നും സി.ബി.എസ്.ഇ അറിയിച്ചിട്ടുണ്ട്. 

അതേ സമയം, ഇതു വരെ നടന്ന  പരീക്ഷകളുടെ മൂല്യനിര്‍ണയം നടത്താന്‍ കേന്ദ്ര മാനവവിഭവശേഷി വികസന മന്ത്രാലയം സംസ്ഥാനങ്ങള്‍ക്ക് നിര്‍ദേശം നല്‍കി.