കൊച്ചി: മാതാവ് പോലും കാണുംമുന്‍പ് ഹൃദയ ശസ്ത്രക്രിയക്കായി എറണാകുളം ലിസി ആശുപത്രിയിലെത്തിച്ച രണ്ടാഴ്ച മാത്രം പ്രായമുള്ള കുഞ്ഞ് തിരികെ നാഗര്‍കോവിലിലേക്ക് മടങ്ങി. ലിസി ആശുപത്രി അധികൃതരാണ് കുഞ്ഞിനെ പ്രത്യേക ആംബുലന്‍സില്‍ കളിയിക്കാവിളയിലെത്തിച്ച് മാതാപിതാക്കളായ സോഫിയ നസീം ബാനു, ഫൈസല്‍ എന്നിവര്‍ക്ക് കൈമാറിയത്. വിളവങ്കോട് എം.എല്‍.എ എസ്. വിജയധരണിയും സ്ഥലത്ത് എത്തിയിരുന്നു.
ലോക്ക് ഡൗണ്‍ ആയതിനാല്‍ നാഗര്‍കോവില്‍ ഇടാലക്കുടി സ്വദേശികളായ മാതാപിതാക്കളും ബന്ധുക്കളും സംസ്ഥാന അതിര്‍ത്തിയായ കളിയിക്കാവിളയില്‍ കുഞ്ഞിന്റെ വരവുംകാത്ത് നില്‍ക്കുകയായിരുന്നു. തിരികെ ജീവിതത്തിലേക്ക് ഓടിയെത്തിയ കണ്‍മണിയെ മാതാവ് ആദ്യമായി കണ്ട രംഗം ഏറെ വൈകാരികമായിരുന്നു.
വിഷുദിനത്തില്‍ ജനിച്ച കുഞ്ഞിനെ നാഗര്‍കോവിലിലെ ജയഹരണ്‍ ആശുപത്രിയില്‍ നിന്നാണ് കേരള, തമിഴ്‌നാട് സര്‍ക്കാരുകളുടെ സമയോചിത ഇടപെടലിലൂടെ എറണാകുളം ലിസി ആശുപത്രിയിലെത്തിച്ച് ശസ്ത്രക്രിയ നടത്തിയത്.
സിസേറിയനിലൂടെ ജനിച്ച കുഞ്ഞിന് ശരീരത്തില്‍ നീലനിറം വ്യാപിച്ചതിനെ തുടര്‍ന്ന് കാര്‍ഡിയോളജിസ്റ്റ് ഡോ. വെങ്കിടേഷ്, ലിസി ആശുപത്രിയുമായി ബന്ധപ്പെട്ട് ഡോ. എഡ്വിന്‍ ഫ്രാന്‍സിസിന്റെ സഹായം തേടുകയായിരുന്നു. മുഖ്യമന്ത്രി പിണറായി വിജയനെ ആശുപത്രി അധികൃതര്‍ ബന്ധപ്പെട്ടതോടെയാണ് കുഞ്ഞിന്റെ കേരളത്തിലേക്കുള്ള വരവ് സാധ്യമായത്.