പുതുനഗരം: പ്രായപൂര്‍ത്തിയാവാത്ത മൂന്ന് വിദ്യാര്‍ഥിനികളെ പീഡിപ്പിച്ച മൂന്നുപേരെ കൊല്ലങ്കോട് പൊലിസ് അറസ്റ്റ്‌ചെയ്തു. വടവന്നൂര്‍ തുമ്പുളംപൊറ്റ നിവാസികളായ രാമകൃഷ്ണന്‍ (59), സുബ്രഹ്മണ്യന്‍ (59), രമേഷ് (25) ,എന്നിവരാണ് അറസ്റ്റിലായത്.
പെണ്‍കുട്ടികള്‍ക്കെതിരെയുള്ള അതിക്രമം നടത്തിയതില്‍ ചൈല്‍ഡ് ലൈന്‍ പ്രവര്‍ത്തകര്‍ പൊലിസില്‍ നല്‍കിയ പരാതിയുടെ അടിസ്ഥാനത്തിലാണ് നടപടി. മൊബൈലില്‍ പകര്‍ത്തിയ നഗ്‌നചിത്രങ്ങള്‍ പെണ്‍കുട്ടിക്ക് കാണിച്ച് കൊടുത്ത് ശരീരത്തിന്റെ പല ഭാഗങ്ങളിലും സ്പര്‍ശിച്ച് പീഡനം നടത്തിയതില്‍ രമേഷിനെതിരെയും, വീട്ടില്‍ മറ്റാരും ഇല്ലാത്ത സമയത്ത് പെണ്‍കുട്ടിയെ പീഡിപ്പിച്ചതിന്റെ പരാതിയില്‍ രാമകൃഷ്ണനെതിരെയും കേസുകള്‍ എടുത്തിട്ടുണ്ട്. സമാന രീതിയിലുള്ള പ്രവര്‍ത്തനം നടത്തിയതിനെതിരേ സുബ്രഹ്മണ്യനെതിരേ കേസെടുത്ത് കൊല്ലങ്കോട് സി.ഐ കെ.പി ബെന്നിയുടെ അന്വോഷണത്തില്‍ അറസ്റ്റു ചെയ്തു.
പെണ്‍കുട്ടിയുടെ സുഹൃത്തിനോട് പറഞ്ഞ ഇവരുടെ അനുഭവം ചൈല്‍ഡ് ലൈന്‍ പ്രവര്‍ത്തകര്‍ നടത്തിയ കൗണ്‍സിലിങ്ങിനിടെ സുഹൃത്ത് അറിയിക്കുകയായിരുന്നു. ഇതേ തുടര്‍ന്ന് പെണ്‍കുട്ടികളില്‍ നിന്നും മൊഴിയെടുത്ത ശേഷം കൊല്ലങ്കോട് പൊലിസിന് പരാതി നല്‍കി. ചിറ്റൂര്‍ ജുഡീഷ്യല്‍ മജിസ്ട്രറ്റിന് മുന്നില്‍ ഹാജരാക്കിയ ഇവരെ റിമാന്‍ഡ് ചെയ്തു.