ഏറ്റുമാനൂര്‍: നിര്‍ത്തിയിട്ടിരുന്ന കെ.എസ്.ആര്‍.ടി.സി ബസിന് പിന്നില്‍ കോഴിയുമായി വന്ന മിനി ലോറി ഇടിച്ച് ബസ് യാത്രക്കാര്‍ ഉള്‍പ്പെടെ എട്ട് പേര്‍ക്ക് പരിക്ക്. എം.സി.റോഡില്‍ തെള്ളകം കാരിത്താസ് കവലയില്‍ പുലര്‍ച്ചെ അഞ്ച് മണി കഴിഞ്ഞായിരുന്നു അപകടം. പരിക്കേറ്റവരില്‍ മൂന്ന് പേര്‍ ബസ് യാത്രക്കാരും ഇതരസംസ്ഥാനതൊഴിലാളികള്‍ ഉള്‍പ്പെടെ അഞ്ച് പേര്‍ മിനി ലോറിയില്‍ സഞ്ചരിച്ചിരുന്നവരുമാണ്.
ബസ് യാത്രക്കാരായ തെള്ളകം കപ്പൂച്ചിന്‍ വിദ്യാഭവനിലെ ശ്രുതിന്‍ (25), മിഥുന്‍ മാത്യു (23), ആല്‍ബി ആന്റണി (27) ലോറി ഡ്രൈവര്‍ പാലാ കടനാട് സ്വദേശി ജോബി (40), ലോറിയിലുണ്ടായിരുന്ന സഹായി കണ്ണൂര്‍ സ്വദേശി കേളച്ചാമുറി കെ.എസ്.ജോസ് (50) എന്നിവരെ തെള്ളകത്തെ സ്വകാര്യ ആശുപത്രിയില്‍ പ്രവേശിപ്പിച്ചു. മറ്റുള്ളവരെ കോട്ടയം മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. അമ്പായത്തോട് നിന്നും കോട്ടയത്തേക്ക് പോകുകയായിരുന്ന ഫാസ്റ്റ് പാസഞ്ചര്‍ ബസ് യാത്രക്കാരെ കയറ്റിയിറക്കുന്നതിന് ജംഗ്ഷനില്‍ നിര്‍ത്തിയപ്പോഴായിരുന്നു അപകടം. ജംഗ്ഷനില്‍ നിന്നും യാത്രക്കാര്‍ ബസിനുള്ളില്‍ പ്രവേശിച്ചയുടന്‍ പിന്നാലെ നിയന്ത്രണം വിട്ട് എത്തിയ മിനി ലോറി ബസിലിടിക്കുകയായിരുന്നു. ഈ യാത്രക്കാര്‍ക്കാണ് പരിക്കേറ്റത്. കോഴിയുമായി കോട്ടയത്തേക്ക് പോകുകയായിരുന്നു ലോറി. ഇടിയുടെ ആഘാതത്തില്‍ ലോറിയുടെ മുന്‍വശം പൂര്‍ണ്ണമായും തകര്‍ന്നു. ഹൈവേ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.