ചീക്കല്ലൂര്‍: മീനങ്ങാടിക്കടുത്ത് കൃഷ്ണഗിരിയില്‍ പെരുന്നാള്‍ ദിനത്തിലുണ്ടായ ബസ് അപകടത്തില്‍ മരണപ്പെട്ട ആത്മസുഹൃത്തുക്കളായ വിനോദിന്റെയും ജോണ്‍സണിന്റെയും മരണം ചീക്കല്ലൂര്‍ ഗ്രാമത്തെ കണ്ണീരിലാഴ്ത്തി. അയല്‍ക്കാരും ഉറ്റ സുഹൃത്തുക്കളുമായിരുന്നു മരണപ്പെട്ടവര്‍. കൃഷ്ണഗിരിയിലെ എസ്‌റ്റേറ്റില്‍ നിന്നും ജോലി കഴിഞ്ഞ് റോഡരികിലൂടെ നടക്കുകയായിരുന്നു വിനോദും ജോണ്‍സണും വിഷ്ണുവും എല്‍ദോയും. കൃഷ്ണഗിരിക്കും അമ്പലപ്പടിക്കുമിടിയിലുള്ള വളവില്‍വെച്ചാണ് ഒന്നിച്ചു നടന്ന ഇവരില്‍ രണ്ടുപേരെ മരണം തട്ടിയെടുത്തത്.
ബത്തേരി-പനമരം റൂട്ടില്‍ സര്‍വിസ് നടത്തുന്ന സെന്റ് മേരീസ് എന്ന ബസ് നിയന്ത്രണംവിട്ട് ഇവര്‍ക്ക് മേല്‍ പതിക്കുകയായിരുന്നു. വിനോദും ജോണ്‍സണും പൂര്‍ണമായും ബസിനടിയില്‍ അകപ്പെട്ടു. വിഷ്ണുവും ഏതാണ്ട് ബസിനടിയില്‍ തന്നെയായിരുന്നു. അല്‍പം മുന്നില്‍ നടക്കുകയായിരുന്ന എല്‍ദോ മാത്രമാണ് നിസാര പരുക്കുകളോടെ അപകടത്തില്‍ നിന്ന് രക്ഷപ്പെട്ടത്. വിനോദും ജോണ്‍സണും കല്‍പ്പറ്റയിലേയും ബത്തേരിയിലേയും ആശുപത്രിയിലേക്ക് എത്തിക്കുമ്പോഴും മരണപ്പെട്ടു.
ഗുരുതരമായി പരുക്കേറ്റ് വിഷ്ണുവിനെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്. എല്‍ദോ കല്‍പ്പറ്റ ലിയോ ആശുപത്രിയിലും ചികിത്സയിലാണ്. അപകടത്തില്‍പ്പെട്ട നാലുപേരും ചീക്കല്ലൂര്‍ സ്വദേശികളാണ്. മരിച്ച വിനോദ് കുമാര്‍ കുടുംബത്തിന്റെ അത്താണിയായിരുന്നു. ഭാര്യക്കു വിഹിതം കിട്ടിയ 10 സെന്റ് സ്ഥലത്ത് ചെറിയ വീട് വെച്ച് താമസിച്ച് വരികയായിരുന്നു. മൂത്ത മകള്‍ ശ്രീജിത പ്ലസ്ടു കഴിഞ്ഞു. ശ്രീനിത പ്ലസ് വണ്‍ പഠിക്കുകയാണ്.
ജോണ്‍സണ്‍ സ്ഥിരമായി പെയിന്റിങ് ജോലിക്കാണ് പോകാറ്. മഴക്കാലമായതോടെ പെയിന്റിങ് ജോലിയില്ലാത്തതിനെ തുടര്‍ന്ന് ഒരാഴ്ചയോളമായി നാലുപേരും ഒരുമിച്ച് കാടു വെട്ട് ജോലിക്ക് പോകാന്‍ തുടങ്ങിയിട്ട്. അഞ്ചാം ക്ലാസ് വിദ്യാര്‍ഥി ഷാരോണ്‍, യു.കെ.ജി വിദ്യാര്‍ഥി സാന്‍മരിയ എന്നിവരാണ് മക്കള്‍. മെഡിക്കല്‍ കോളേജില്‍ ഗുരുതരാവസ്ഥയിലുള്ള വിഷ്ണു കല്‍പ്പറ്റയിലെ സ്വകാര്യ സ്ഥാപനത്തില്‍ ഇലക്‌ട്രോണിക്‌സ് വിദ്യാര്‍ത്ഥിയാണ്. അവധി ദിവസങ്ങളില്‍ ജോലിക്ക് പോയിട്ടാണ് വിഷ്ണു പഠനത്തിനുള്ള പണം കണ്ടെത്തുന്നത്.
കുടുംബത്തിന്റെ ഏക ആശ്രയവുമാണ് ഈ 23കാരന്‍. വിഷ്ണു തിരിച്ചത്തണേയെന്ന പ്രാര്‍ഥനയിലാണിപ്പോള്‍ ചീക്കല്ലൂര്‍ ഗ്രാമമുള്ളത്. മരണപ്പെട്ടവരുടെ മൃതദേഹങ്ങള്‍ പൊതുദര്‍ശനത്തിന് വെച്ച ചീക്കല്ലൂര്‍ എല്‍.പി സ്‌കൂളിലും വീടുകളിലും നൂറു കണക്കിന് ആളുകളാണെത്തിയത്.
വിനോദിന്റെ മൃതദേഹം വീട്ടുവളപ്പിലും ജോണ്‍സണിന്റേത് കണിയാമ്പറ്റ സെന്റ് ജോര്‍ജ് യാക്കോബായ സുറിയാനി പള്ളിയിലും വൈകിട്ടോടെ സംസ്‌കരിച്ചു. പരേതരോടുള്ള ആദരസൂചകമായി ചീക്കല്ലൂരില്‍ വ്യാപാര സ്ഥാപനങ്ങള്‍ ഇന്നലെ ഹര്‍ത്താല്‍ ആചരിച്ചു.