റോസ്റ്റോവ്: വമ്പന്മാര്‍ക്കെല്ലാം അടിതെറ്റുന്ന ലോകകപ്പില്‍ സ്വിറ്റ്‌സര്‍ലന്റിനെതിരേ ബ്രസീലിന് സമനിലക്കുരുക്ക്. കളിയുടെ തുടക്കത്തില്‍ ബ്രസീല്‍ മികച്ച കളി പുറത്തെടുത്തെങ്കിലും സ്വിറ്റ്‌സര്‍ലന്റ് പ്രതിരോധത്തിന് മുന്നില്‍ ബ്രസീല്‍ കീഴടങ്ങി. 20-ാം മിനുട്ടിലെ ഫിലിപ് കുട്ടീഞ്ഞോയുടെ ഗോള്‍ വരെ ബ്രസീല്‍ ടീമിന്റെ തനി സ്വഭാവം കാണിച്ചു. പക്ഷേ പിന്നീട് സ്വിറ്റ്‌സര്‍ലന്റിന്റെ മുന്നേറ്റമായിരുന്നു കണ്ടത്. 50-ാം മിനുട്ടില്‍ ഗോള്‍ തിരിച്ചടിച്ച് സ്റ്റീവന്‍ സുബര്‍ ബ്രസീലിനെ വിറപ്പിച്ചു. പിന്നീട് സ്വിസ് ഗോള്‍മുഖത്തേക്ക് വരാന്‍ ബ്രസീലിനെ സ്വിസ് പ്രതിരോധ നിര അനുവദിച്ചില്ല. പ്രതിരോധ നിരയില്‍ ശക്തനായി നിലയുറപ്പിച്ച തിയാഗോ സില്‍വയുടെ ഇടപെടല്‍ കൊണ്ടായിരുന്നു കൂടുതല്‍ ഗോളില്‍ നിന്ന് ബ്രസീലിനെ രക്ഷിച്ചത്. കാസാമിറോക്കും മാഴ്‌സലോക്കും മികച്ച പ്രകടനം പുറത്തെടുക്കാന്‍ കഴിയാതിരുന്നതും ബ്രസീലിന് തിരിച്ചടിയായി. മഞ്ഞക്കാര്‍ഡ് കണ്ടതിനെ തുടര്‍ന്ന് കാസാമിറോയെ പിന്‍വലിച്ചതും ബ്രസീലിന് വിനയായി. നെയ്മറെ അനങ്ങാന്‍ അനുവദിക്കാതിരുന്ന സ്വിസ് പ്രതിരോധത്തിനാണ് ഫുള്‍ ക്രഡിറ്റും. കാരണം ഇടത് ഹാഫിലും വിങ്ങിലും കളിച്ചിരുന്ന ബഹാറാമി, സ്‌കാര്‍, ലിച്ച്സ്റ്റീനര്‍ എന്നിവര്‍ നെയ്മറിനെ വീഴ്ത്തിയതിനായിരുന്നു മഞ്ഞക്കാര്‍ഡ് കണ്ടത്. സാക്കയും ഷാക്കിരിയും നിരവധി മുന്നേറ്റങ്ങള്‍ നടത്തിയെങ്കിലും ഫലം കണ്ടില്ല. പലപ്പോഴും ഷാക്കിരിയില്‍നിന്ന് അലസമായ കളി പുറത്ത് വന്നു. സ്വിസ് ഗോള്‍ കീപ്പര്‍ സോമറിനും വിജയത്തോളം പോന്ന സമനിലയില്‍ പങ്കുണ്ട്. ബ്രസീല്‍ പോസ്റ്റിലേക്കടിച്ച 21 ഷോട്ടുകളും തടഞ്ഞ് ടീമിനെ രക്ഷിച്ചത് സോമറായിരുന്നു. ഏഴു കോര്‍ണറുകള്‍ കിട്ടിയെങ്കിലും ബ്രസീലിന് മുതലാക്കാനായില്ല. ആദ്യ മത്സരത്തില്‍ തന്നെ സമനില വഴങ്ങിയതോടെ അടുത്ത രണ്ട് മത്സരത്തിലും ബ്രസീല്‍ സമ്മര്‍ദത്തിലാകും. മികച്ച ടീമായ സെര്‍ബിയയേയും കോസ്റ്റ റിക്കയേയും ബ്രസീല്‍ എങ്ങനെ നേരിടുമെന്ന് കാത്തിരുന്ന് കാണാം.