സോച്ചി: ലോകകപ്പിലെ തന്റെ ആദ്യത്തെ ഗോള്‍ തന്നെ മറ്റൊരാളുടെ പേരില്‍ എഴുതിച്ചേര്‍ത്ത സങ്കടത്തിലാണ് പോള്‍ പോഗ്ബയെന്ന ഫ്രാന്‍സ് മിഡ്ഫീല്‍ഡര്‍. ഗ്രൂപ്പ് സിയിലെ ആദ്യ മത്സരത്തില്‍ ഫ്രാന്‍സും ആസ്‌ത്രേലിലയും തമ്മില്‍ ഏറ്റുമുട്ടിയപ്പോഴായിരുന്നു പോഗ്ബയുടേതെന്ന് അവകാശപ്പെടാവുന്ന ഗോള്‍ പിറന്നത്. മത്സരത്തില്‍ ഒന്നിനെതിരേ രണ്ട് ഗോളുകള്‍ക്കായിരുന്ന ഫ്രാന്‍സ് ജയിച്ചത്. ഒരു ഗോള്‍ ഗ്രിസ്മാന്റെ പേരിലും രണ്ടാമത്തെ ഗോള്‍ പോഗ്ബയുടെ പേരിലുമായിരുന്നു. ഗോള്‍ ലൈന്‍ ടെക്‌നോളജിയിലൂടെയായിരുന്നു പോഗ്ബയുടെ ഗോള്‍ അനുവദിച്ചത്. എന്നാല്‍ പിന്നീടാണ് ഫിഫ തീരുമാനം മാറ്റിയത്. പോഗ്ബ ഷോട്ടെടുത്തപ്പോള്‍ ആസ്‌ത്രേലിയന്‍ താരം അസീസ് ബെഹിച്ചിന്റെ ശരീരത്തില്‍ തട്ടി റിഫ്‌ളക്ട് ചെയ്തായിരുന്നു പന്ത് പോസ്റ്റിലെത്തിയതെന്നാണ് ഫിഫയുടെ കണ്ടുപിടിത്തം. അതുകൊണ്ട് ഗോള്‍ പോഗ്ബയുടെ പേരില്‍ ചേര്‍ക്കാനാകില്ലെന്നും ഫിഫ വ്യക്തമാക്കി.