മൊഗാദിഷു: സോമാലിയന്‍ തലസ്ഥാനമായ മൊഗാദിഷുവിലുണ്ടായ ഭീകരാക്രമണത്തില്‍ 30 മരണം. സംഭവത്തെ തുടര്‍ന്ന് നഗരത്തില്‍ സൈന്യവും ഭീകരരും തമ്മില്‍ ശക്തമായ ഏറ്റുമുട്ടല്‍ തുടരുകയാണ്.

നഗരമധ്യത്തിലെ മക്ക മുകറമ ഹോട്ടലിനു സമീപത്താണ് അശ്ശബാബ് ഭീകരര്‍ ബോംബ് സ്‌ഫോടനം നടത്തിയത്. ഹോട്ടലിനു പുറത്ത് രണ്ടു ബോംബുകള്‍ സ്ഥാപിച്ചായിരുന്നു ആക്രമണം. തുടര്‍ന്നു സമീപത്തെ കെട്ടിടത്തില്‍ തമ്പടിച്ച ഭീകരര്‍ ആക്രമണ വിവരമറിഞ്ഞെത്തിയ സൈനികര്‍ക്കുനേരെ നിറയൊഴിക്കുകയും ചെയ്തു. അവസാനമായി വിവരം ലഭിക്കുമ്പോഴും ഇവിടെ സൈന്യവും ഭീകരരും തമ്മില്‍ ഏറ്റുമുട്ടല്‍ തുടരുകയാണ്.ഇരുസംഭവങ്ങളിലുമായി കൊല്ലപ്പെട്ടവരിലേറെയും സാധാരണക്കാരാണ്. 80ലേറെ പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്. മരണസംഖ്യ ഇനിയും ഉയരുമെന്നാണ് അധികൃതര്‍ നല്‍കുന്ന വിവരം.