കൊണ്ടോട്ടി: ഹജ്ജ് തീര്‍ഥാടനത്തിന് ഗ്രീന്‍ കാറ്റഗറിയില്‍ താമസത്തിന് അപേക്ഷിച്ച 18,000 പേരെ അസീസിയ്യയിലേക്ക് മാറ്റുന്നു. സഊദിയിലെ മക്ക ഹറം ശരീഫിന് സമീപം കെട്ടിടങ്ങള്‍ കണ്ടെത്താനാകാത്തതിനെ തുടര്‍ന്നാണ് തീര്‍ഥാടകര്‍ക്ക് കാറ്റഗറി മാറേണ്ടി വരുന്നത്. ഹജ്ജിന് ഗ്രീന്‍, അസീസിയ്യ കാറ്റഗറികളിലാണ് മക്കയില്‍ താമസം ഒരുക്കുന്നത്. പരിശുദ്ധ മക്കക്ക് സമീപത്തായാണ് ഗ്രീന്‍ കാറ്റഗറിയില്‍ താമസം നല്‍കുന്നത്. ഇതിന് ചെലവ് കൂടും. അസീസിയ്യ കാറ്റഗറി ഹറമില്‍ നിന്ന് അഞ്ച് മുതല്‍ ഏഴ് കിലോമീറ്റര്‍വരെ അകലെയാണ്. ഇന്ത്യയില്‍ നിന്ന് ഈ വര്‍ഷം 30,000 പേരാണ് ഹജ്ജിന് ഗ്രീന്‍കാറ്റഗറിയില്‍ അപേക്ഷിച്ചത്. ഇവരില്‍ 18,000 പേര്‍ക്കും ഗ്രീന്‍കാറ്റഗറിയില്‍ താമസ സൗകര്യം ലഭ്യമാക്കാനായിട്ടില്ല. ശേഷിക്കുന്ന 12,000 പേര്‍ക്ക് മാത്രമാണ് ഗ്രീനില്‍ താമസം ലഭിക്കുക. കാറ്റഗറിമാറാന്‍ സ്വയം തയാറുള്ളവര്‍ 30നുള്ളില്‍ ഹജ്ജ് കമ്മറ്റിക്ക് അപേക്ഷ നല്‍കണം. കാറ്റഗറി മാറുന്നത് വഴി കുറവുവരുന്ന പണം ഹജ്ജിന് ശേഷം തിരിച്ചു നല്‍കും. കാറ്റഗറി മാറാന്‍ സ്വയം തയാറാവാത്ത പക്ഷം തീര്‍ഥാടകരില്‍ നിന്ന് നറുക്കെടുപ്പ് നടത്തി 12,000 പേരെ തെരഞ്ഞെടുക്കും. ശേഷിക്കുന്നവരെ അസീസിയ്യയിലേക്ക് മാറ്റും. ഹജ്ജിന് സമയബന്ധിതമായി കെട്ടിടങ്ങള്‍ കണ്ടെത്താന്‍ കഴിയാത്തതിനാലാണ് അവസാന നിമിഷം കാറ്റഗറി മാറേണ്ടിവരുന്നത്. കേരളത്തില്‍ നിന്ന് നാലായിരത്തോളം പേരാണ് ഗ്രീന്‍കാറ്റഗറിയില്‍ അപേക്ഷ നല്‍കിയത്.