തിരുവനന്തപുരം: സംസ്ഥാനത്ത് സാമ്പത്തിക സ്ഥിതി മോശമാണെന്ന് ധനമന്ത്രി തോമസ് ഐസക്. മാര്‍ച്ച്, ഏപ്രില്‍ മാസങ്ങളിലെ ജിഎസ്ടി വരുമാനത്തില്‍ വന്‍ഇടിവാണ് ഉണ്ടായത്. മെയ് മാസത്തെ അവസ്ഥ ഇതിലും മോശമായിരിക്കുമെന്ന് മന്ത്രി പറഞ്ഞു.

കുടിശ്ശികകള്‍ തീര്‍ക്കുന്നത് വന്‍ സാമ്പത്തിക തിരിച്ചടിയുണ്ടാക്കും. സഹായിച്ചില്ലെങ്കിലും തരാനുള്ള പണം കേന്ദ്രസര്‍ക്കാര്‍ നല്‍കണമെന്നും അദ്ദേഹം പറഞ്ഞു.പ്രതീക്ഷിച്ചതിന്റെ നാലിലൊന്ന് വരുമാനം പോലുമില്ലെന്ന് തോമസ് ഐസക്ക് വ്യക്തമാക്കി.

ലോക്ക് ഡൗണ്‍ മൂന്നാമതും നീട്ടിയ സര്‍ക്കാര്‍ സംസ്ഥാനങ്ങള്‍ക്ക് എന്തു സംഭവിക്കുന്നെന്ന് ശ്രദ്ധിക്കുന്നില്ല. സംസ്ഥാനങ്ങള്‍ തകരാതിരിക്കാനുള്ള നടപടികള്‍ കേന്ദ്ര സര്‍ക്കാര്‍ സ്വീകരിക്കണമെന്നും അദ്ദേഹം പറഞ്ഞു.

കേന്ദ്രസര്‍ക്കാരിന്റെ നയം തിരുത്തിയേ തീരൂ എന്നും സംസ്ഥാനങ്ങളെയും ജനങ്ങളെയും ഒരുമിച്ച് നിര്‍ത്തിയാലല്ലാതെ കൊവിഡിനെതിരെയുള്ള പോരാട്ടം മുന്നോട്ട് കൊണ്ടു പോവാന്‍ കഴിയില്ലെന്നും അദ്ദേഹം പറഞ്ഞു.