പേരാമ്പ്ര: ആഭ്യന്തരകലാപം രൂക്ഷമായ ലിബിയയില്‍നിന്നു തട്ടിക്കൊണ്ടുപോയ പേരാമ്പ്ര- കൂരാച്ചുണ്ട് സ്വദേശിയെ മോചിപ്പിച്ചു. മലയാളി ഐ.ടി ഉദ്യോഗസ്ഥനായ കേളോത്ത്‌വയല്‍ നെല്ലിവേലില്‍ ജോസഫിന്റെ മകന്‍ റെജി ജോസഫിനെയാണു മാര്‍ച്ച് 31ന് തീവ്രവാദികള്‍ തട്ടിക്കൊണ്ടുപോയത്. 

ലിബിയയുടെ തലസ്ഥാനമായ ട്രിപ്പോളിയില്‍ കുടുംബസമേതം താമസിച്ചുവരികയായിരുന്നു. ലിബിയന്‍ സര്‍ക്കാരിന്റെ പദ്ധതിയായ സിവിലിയന്‍ രജിസ്‌ട്രേഷന്‍ അതോറിറ്റിയില്‍ ജോലിക്കിടെയാണ് റെജിയേയും മൂന്ന് ലിബിയക്കാരെയും തീവ്രവാദികള്‍ തട്ടിക്കൊണ്ടുപോയത്.
തട്ടിക്കൊണ്ടുപോയശേഷം അല്‍ദിവാന്‍ ഐ.ടി കമ്പനി ഇവരുടെ മോചനത്തിനായി തീവ്രശ്രമം നടത്തിവരികയായിരുന്നു. കേന്ദ്ര സംസ്ഥാന സര്‍ക്കാരും പ്രവാസി വ്യവസായികളും വിവിധസംഘടനകളും മോചനത്തിനായി പരിശ്രമിച്ചു.
മുന്‍ മുഖ്യമന്ത്രി ഉമ്മന്‍ചാണ്ടി ലിബിയന്‍ സര്‍ക്കാരുമായും വിദേശകാര്യ വകുപ്പുമായും ബന്ധപ്പെട്ടിരുന്നു.
ലിബിയന്‍ സര്‍ക്കാരിന്റെ അവസരോചിതമായ ഇടപെടലാണ് കഴിഞ്ഞ ദിവസം റെജിയുടെ മോചനത്തിന് വഴിവച്ചത്.