തൊടുപുഴ: ഇടുക്കി രൂപതയുടെ പ്രഥമ അധ്യക്ഷന്‍ മാര്‍ മാത്യു ആനിക്കുഴിക്കാട്ടില്‍ (78) അന്തരിച്ചു. വെളളിയാഴ്ച പുലര്‍ച്ചെ കോലഞ്ചരി മെഡിക്കല്‍ കോളജ് ആശുപത്രിയിലായിരുന്നു അന്ത്യം. സംസ്‌കാരം ചൊവ്വാഴ്ച 2.30ന്. പാലാ കടപ്ലാമറ്റം ആനിക്കുഴിക്കാട്ടില്‍ ലൂക്കാ -ഏലിക്കുട്ടി ദമ്പതികളുടെ മകനാണ്. 1971 മാര്‍ച്ച് 15 ന് പൗരോഹിത്യം സ്വീകരിച്ചു. ബെല്‍ജിയം ലുവെയ്ന്‍ സര്‍വകലാശാലയില്‍നിന്നു ദൈവശാസ്ത്രത്തില്‍ ഡോക്ടറേറ്റ് കരസ്ഥമാക്കി. കോതമംഗലം രൂപതയുടെ ചാന്‍സിലറും 2003ല്‍ കോതമംഗലം രൂപത വിഭജിച്ച് ഇടുക്കി രൂപത സ്ഥാപിതമായപ്പോള്‍ ആദ്യ മെത്രാനും ആയി. 2018ല്‍ വിരമിച്ചു. മലയോര മേഖലയിലെ കുടിയേറ്റ കര്‍ഷകര്‍ക്കായി ഹൈറേഞ്ച് സംരക്ഷണ സമിതി രൂപീകരിക്കുന്നതില്‍ നിര്‍ണായക പങ്കുവഹിച്ചിട്ടുണ്ട്.