ഏറ്റുമാനൂര്‍: അനധികൃത മദ്യവില്‍പ്പന നടത്തിയ സംഘത്തെ പിടികൂടാനെത്തിയ എക്‌സൈസ് ഉദ്യോഗസ്ഥര്‍ക്കുനേരെ ആക്രമണം. ഇന്നലെ രാവിലെ 10.30തോടെ വൈക്കം ഇടവട്ടത്തായിരുന്നു സംഭവം. മദ്യവില്‍പ്പന നടക്കുന്നതറിഞ്ഞ് സ്ഥലത്തെത്തിയ ആറംഗ എക്‌സൈസ് സംഘത്തിനുനേരെയാണ് ആക്രമണം നടന്നത്. ആക്രമണത്തില്‍ സിവില്‍ എക്‌സൈസ് ഓഫിസര്‍മാരായ സനല്‍, ജോഷി, രതീഷ്‌കുമാര്‍, രതീഷ് ലാല്‍ എന്നിവര്‍ക്ക് പരുക്കേറ്റു. സംഭവത്തില്‍ നാലുപേരെ അറസ്റ്റ് ചെയ്തിട്ടുണ്ട്. മദ്യവില്‍പ്പന നടത്തിയ എം.വിജുമോന്‍, സുരേഷ് എന്നിവരും പൊതുസ്ഥലത്ത് പരസ്യമായി മദ്യപിച്ച ആര്‍. രതീഷ്, വിഷ്ണു എസ്.നായര്‍, റെനി എന്നിവര്‍ ചേര്‍ന്നാണ് അക്രമം നടത്തിയത്. ഇവരെ വൈക്കം എക്‌സൈസ് റെയ്ഞ്ച് ഇന്‍സ്‌പെക്ടര്‍ അറസ്റ്റ് ചെയ്യുകയായിരുന്നു.