കണ്ണൂര്‍: എസ്.കെ.എസ്.എസ്.എഫ് പ്രവര്‍ത്തകനെ ഓഫിസില്‍ കയറി വെട്ടിക്കൊലപ്പെടുത്താന്‍ ശ്രമിച്ച സംഭവത്തില്‍ രണ്ടു കാന്തപുരം സുന്നി വിഭാഗം പ്രവര്‍ത്തകരെ പൊലിസ് അറസ്റ്റുചെയ്തു. എസ്.കെ.എസ്.എസ്.എഫ് പ്രവര്‍ത്തകനും യൂത്ത് ലീഗ് പാലത്തുങ്കര പള്ളിയത്ത് ശാഖാ പ്രസിഡന്റുമായ കെ.കെ സാബിറിനെ(27) ആക്രമിച്ച സംഭവത്തില്‍ പള്ളിയത്ത് നൂര്‍ മഹലില്‍ മുഹമ്മദ് ഷരീഫ് (30), സൈനബ മന്‍സിലില്‍ ബിലാല്‍ (19) എന്നിവരെയാണു വളപട്ടണം സി.ഐ ടി.കെ രത്‌നകുമാറും സംഘവും അറസ്റ്റുചെയ്തത്. പ്രതികളെ കണ്ണൂര്‍ ജുഡീഷ്യല്‍ ഒന്നാംക്ലാസ് കോടതി(രണ്ട്) റിമാന്‍ഡ് ചെയ്തു.
സംഭവത്തില്‍ അഞ്ചുപേര്‍ക്കെതിരേയാണു മയ്യില്‍ പൊലിസ് വധശ്രമത്തിനു കേസെടുത്തത്. മൂന്നുപേര്‍ ഒളിവിലാണെന്നു പൊലിസ് അറിയിച്ചു.  വ്യാഴാഴ്ച രാത്രി ഏഴോടെയാണ് എസ്.കെ.എസ്.എസ്.എഫ് പള്ളിയത്ത് ശാഖാ ഓഫിസില്‍ വാക്കത്തിയടക്കമുള്ള മാരകായുധങ്ങളുമായി എത്തിയ സംഘം സാബിറിനെ വെട്ടിപ്പരുക്കേല്‍പ്പിച്ചത്. തലയ്ക്കും നട്ടെല്ലിനും പരുക്കേറ്റ സാബിര്‍ ജില്ലാ ആശുപത്രിയില്‍ ചികിത്സയിലാണ്. സാബിറിനെ ആശുപത്രിയിലെത്തി എസ്.കെ.എസ്.എഫ് നേതാക്കളായ അബ്ദുസലാം ദിരിമി കിണവക്കല്‍, ബഷീര്‍ അസ്അദി നമ്പ്രം, മഹറൂഫ് മട്ടന്നൂര്‍, എസ്.വൈ.എസ് ജില്ലാ ജോയിന്റ് സെക്രട്ടറി അഷ്‌റഫ് ബംഗാളിമുഹല്ല എന്നിവര്‍ സന്ദര്‍ശിച്ചു.