തിരുവനന്തപുരം: കൊവിഡ് പശ്ചാത്തലത്തില്‍ സംസ്ഥാന സര്‍ക്കാര്‍ പ്രഖ്യാപിച്ച സൗജന്യ ഭക്ഷ്യകിറ്റിന്റെ മൂന്നാംഘട്ട വിതരണം 10ന് ശേഷം.
സബ്‌സിഡിയുള്ള മുന്‍ഗണനേതരക്കാര്‍ക്കുള്ള (നീല കാര്‍ഡുകള്‍) കിറ്റുകളാണ് മൂന്നാംഘട്ടത്തില്‍ വിതരണം ചെയ്യുക. 10ന് ശേഷമായിരിക്കും മൂന്നാംഘട്ട വിതരണം സംബന്ധിച്ച് തീരുമാനം ഉണ്ടാവുകയെന്ന് ഭക്ഷ്യമന്ത്രിയുടെ ഓഫിസ് അറിയിച്ചു. മൂന്നാംഘട്ടത്തില്‍ വിതരണംചെയ്യേണ്ട മുന്‍ണനേതര സബ്‌സിഡി വിഭാഗത്തില്‍ 25.04 ലക്ഷം കാര്‍ഡുകളാണുള്ളത്. ഇതിനായുള്ള പല സാധനങ്ങള്‍ക്കും ക്ഷാമമുണ്ട്. ഇതരസംസ്ഥാനങ്ങളില്‍ നിന്നുള്‍പ്പെടെ എത്തേണ്ടതാണ് പല സാധനങ്ങളും.
നാലാംഘട്ടത്തില്‍ വിതരണംചെയ്യേണ്ട വെള്ള കാര്‍ഡുകാര്‍ക്കും കിറ്റുകള്‍ വൈകും. 24.80 ലക്ഷം കാര്‍ഡുകളുള്ള മുന്‍ഗണനേതര നോണ്‍ സബ്‌സിഡി (വെള്ള കാര്‍ഡ്) വിഭാഗത്തില്‍ ആകെ 98.27 ലക്ഷം ആളുകളാണ് ഉള്‍പ്പെട്ടിട്ടുള്ളത്. മൂന്നാംഘട്ട വിതരണത്തിന് ശേഷമായിരിക്കും ഇവര്‍ക്കുള്ള വിതരണം ആരംഭിക്കുക. അതിനിടെ, കിറ്റ് വിതരണം ഈ മാസം തന്നെ പൂര്‍ത്തിയാക്കുമെന്ന് ഭക്ഷ്യവകുപ്പ് അറിയിച്ചു.