കണ്ണൂര്‍: കിഴുന്നപ്പാറയില്‍ കടവരാന്തയില്‍ അവശനായി കണ്ടെത്തിയ യുവാവ് ചികിത്സക്കിടെ മരിച്ച സംഭവത്തില്‍ ദുരൂഹതയുണ്ടെന്ന ആരോപണത്തെ തുടര്‍ന്ന് അസ്വാഭാവിക മരണത്തിന് എടക്കാട് പൊലിസ് കേസെടുത്തു. തോട്ടട കിഴുന്നപ്പാറയിലെ പി.കെ സാജിര്‍(32) ആണ് കഴിഞ്ഞദിവസം മരിച്ചത്. യുവാവിന് ഗുരുതര പരുക്കേറ്റത് എങ്ങനെയെന്നതാണ് നാട്ടുകാരെയും ബന്ധുക്കളെയും സംശയത്തിലാക്കുന്നത്. കടവരാന്തയില്‍ അവശനായി കണ്ടെത്തിയ സാജിറിനെ നാട്ടുകാരും വീട്ടുകാരും ചേര്‍ന്ന് കണ്ണൂരിലെ സ്വകാര്യ ആശുപത്രിയില്‍ എത്തിക്കുകയായിരുന്നു. നട്ടെല്ലിന് സാരമായ ക്ഷതമേറ്റതിനാല്‍ വിദഗ്ധ ചികിത്സയ്ക്കായി മംഗളൂരുവിലെ ആശുപത്രിയില്‍ കൊണ്ടുപോയി. അടിയന്തിര ശസ്ത്രക്രിയ നടത്തിയാലും ജീവന്‍ രക്ഷിക്കുന്നത് സംശയമാണെന്നു ഡോക്ടര്‍മാര്‍ ഇവിടെനിന്ന് അറിയിച്ചു. തുടര്‍ന്ന് യുവാവിനെ ബന്ധുക്കള്‍ ചക്കരക്കല്ലിലെ ആയുര്‍വേദ കേന്ദ്രത്തില്‍ പ്രവേശിപ്പിച്ചു. കഴിഞ്ഞദിവസം ശ്വാസതടസം അനുഭവപ്പെട്ടതിനെ തുടര്‍ന്ന് താണയിലെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. സംഭവത്തില്‍ കൂടുതല്‍ അന്വേഷണം ആവശ്യപ്പെട്ട് നാട്ടുകാര്‍ എടക്കാട് പൊലിസിനെ വിവരമറിയിച്ചതിനെതുടര്‍ന്ന് എസ്.ഐ മഹേഷ് കണ്ടമ്പേത്തിന്റെ നേതൃത്വത്തിലുള്ള പൊലിസ് സംഘം സ്ഥലത്തെത്തി മൃതദേഹം ഇന്‍ക്വസ്റ്റ് നടത്തി. തുടര്‍ന്ന് പരിയാരം മെഡിക്കല്‍ കോളജില്‍ പോസ്റ്റ്‌മോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് വിട്ടുനല്‍കി. സുബൈര്‍-ഷാഹിന ദമ്പതികളുടെ മകനാണ് മരിച്ച സാജിര്‍. ഭാര്യ: അസീന. രണ്ടാഴ്ച മാത്രം പ്രായമുള്ള പെണ്‍കുഞ്ഞ് ഉണ്ട്.