തേഞ്ഞിപ്പലം: പാണമ്പ്രയില്‍ വര്‍ക്ക്‌ഷോപ്പ് കെട്ടിടം തകര്‍ന്നുവീണ് ലക്ഷങ്ങളുടെ നാശനഷ്ടം. ദേശീയപാത പാണമ്പ്ര അങ്ങാടിയിലെ ചേളാരി ഭാഗത്തേക്കുള്ള ബസ് കാത്തിരിപ്പു കേന്ദ്രത്തിന്റെ പിറകുവശത്തു പ്രവര്‍ത്തിച്ചുവരുന്ന വര്‍ക്ക്‌ഷോപ്പാണ് ഇന്നലെ രാവിലെ എട്ടരയോടെ തകര്‍ന്നുവീണത്.
പാണമ്പ്ര കൊയപ്പകളത്തില്‍ തോട്ടത്തില്‍ മൊയ്തീന്‍കുട്ടിയുടെ ഉടമസ്ഥതയിലുള്ളതാണ് കെട്ടിടം. ഓടുമേഞ്ഞ കെട്ടിടമാണ് തകര്‍ന്നത്. ഓടുകള്‍ പൂര്‍ണമായും പൊട്ടിനശിച്ചു. കൂടാതെ കഴുക്കോലുകളടക്കമുള്ള മറ്റു വസ്തുക്കള്‍ക്കും കേടുപാടുകള്‍ സംഭവിച്ചിട്ടുണ്ട്. രണ്ടു ലക്ഷം രൂപയുടെ നാശനഷ്ടം സംഭവിച്ചതായി കെട്ടിടമുടമ തോട്ടത്തില്‍ മൊയ്തീന്‍കുട്ടി പറഞ്ഞു. ഇടിമുഴിക്കല്‍ സ്വദേശി സുബ്രഹ്മണ്യനാണ് വര്‍ക്ക്‌ഷോപ്പ് നടത്തിപ്പുകാരന്‍. കെട്ടിടം തകരുന്ന സമയം വര്‍ക്കുഷോപ്പില്‍ ആളില്ലാത്തതിനാല്‍ ദുരന്തം ഒഴിവായി.