ഭോപ്പാല്‍: മധ്യപ്രദേശില്‍ സാനിറ്റൈസറില്‍നിന്ന് മദ്യം നിര്‍മിച്ചയാളെ പൊലിസ് അറസ്റ്റ് ചെയ്തു. റെയ്‌സാന്‍ ജില്ലയിലാണ് സംഭവം. ഹാന്‍ഡ് സാനിറ്റൈസറിന്റെ പ്രധാന ചേരുവയാണ് ആല്‍ക്കഹോള്‍. സുല്‍ത്താന്‍പുരിലെ ബോരിയജാഗിര്‍ ഗ്രാമത്തിലുള്ള ഇന്‍ദാല്‍ സിങ് രാജ്പുത് എന്നയാളാണ് റിവേഴ്‌സ് എന്‍ജിനിയറിങ്ങിലൂടെ പൊലിസിനെ ഞെട്ടിച്ചത്.
72 ശതമാനം ആല്‍ക്കഹോളുള്ള സാനിറ്റൈസറില്‍ നിന്നാണ് രാജ്പുത് മദ്യമുണ്ടാക്കിയതെന്ന് പൊലിസ് പറഞ്ഞു.
ഇത് ഒറ്റപ്പെട്ട സംഭവമാണെന്ന് പൊലിസ് സൂപ്രണ്ട് മോണിക്ക ശുക്ല പറഞ്ഞു. രാജ്പുതിനെതിരേ എക്‌സൈസ് വകുപ്പ് പ്രകാരം കേസെടുത്തിട്ടുണ്ട്.
ലോക്ക്ഡൗണിനെ തുടര്‍ന്ന് സംസ്ഥാനത്തെ മദ്യ ഷോപ്പുകളെല്ലാം അടച്ചിട്ടിരിക്കുകയാണ്. നിരവധി ഡിസ്റ്റിലറികള്‍ക്ക് സാനിറ്റൈസറുണ്ടാക്കാന്‍ അനുമതി ലഭിച്ചിട്ടുമുണ്ട്.