ന്യൂഡല്‍ഹി: തനിക്കെതിരേ രാജ്യദ്രോഹക്കേസ് ചുമത്താന്‍ കാരണമായ പരാമര്‍ശത്തില്‍ താന്‍ ഉറച്ചുനില്‍ക്കുന്നതായും പോസ്റ്റ് പിന്‍വലിക്കുകയോ മാപ്പു പറയുകയോ ചെയ്തിട്ടില്ലെന്നും ഡല്‍ഹി ന്യൂനപക്ഷ കമ്മിഷന്‍ ചെയര്‍മാന്‍ ഡോ. സഫറുല്‍ ഇസ്‌ലാം ഖാന്‍.
ചില മാധ്യമങ്ങള്‍ താന്‍ പോസ്റ്റ് ഡിലീറ്റ് ചെയ്തതായും മാപ്പു പറഞ്ഞതായും പ്രചരിപ്പിക്കുന്നുണ്ട്. എന്നാല്‍ അതുണ്ടായിട്ടില്ല. പോസ്റ്റ് തെറ്റായ സമയത്തായിപ്പോയി എന്നതില്‍ മാത്രമാണ് മാപ്പു പറഞ്ഞത്. കൊവിഡ് കാരണം ആരോഗ്യ അടിയന്തരാവസ്ഥ നിലനില്‍ക്കുന്ന സമയത്ത് പറയേണ്ട കാര്യമായിരുന്നില്ല അത്. തന്റെ പോസ്റ്റ് ഫേസ്ബുക്ക് പേജില്‍ തന്നെയുണ്ട്. അതിനപ്പുറം താന്‍ പറഞ്ഞ കാര്യങ്ങളില്‍ താന്‍ ഉറച്ചുനില്‍ക്കുന്നുവെന്ന് മെയ് ഒന്നിലെ കുറിപ്പില്‍ വ്യക്തമാക്കുകയും ചെയ്തിട്ടുണ്ട്. ഭാവിയിലും ഇതേ നിലപാടു തന്നെ തുടരും. കേസോ അറസ്റ്റോ ജയില്‍വാസമോ തന്റെ നിലപാടുകളെ മാറ്റില്ലെന്നും അദ്ദേഹം പ്രസ്താവനയില്‍ പറഞ്ഞു.
സഫറുല്‍ ഇസ്‌ലാം ഖാനെതിരേ കഴിഞ്ഞ ദിവസമാണ് ഡല്‍ഹി പൊലിസ് രാജ്യദ്രോഹക്കുറ്റം ചുമത്തി കേസെടുത്തത്. ഇന്ത്യയിലെ ഇസ്‌ലാമോഫോബിയയ്‌ക്കെതിരേ അറബ് ലോകത്തു നടന്ന കാംപയിനെ അനുകൂലിച്ച കൂവൈത്തിനു നന്ദി പറഞ്ഞ് ഫേസ്ബുക്കില്‍ പോസ്റ്റിട്ടതിനാണ് കേസ്.
സമൂഹമാധ്യമങ്ങളില്‍ വിദ്വേഷ പോസ്റ്റിട്ടെന്ന ഡല്‍ഹി വസന്ത്കുഞ്ച് സ്വദേശിയുടെ പരാതിയുടെ അടിസ്ഥാനത്തിലാണ് പൊലിസ് കേസ് രജിസ്റ്റര്‍ ചെയ്തത്. 124 എ (രാജ്യദ്രോഹം), 153 എ (രണ്ടു വിഭാഗങ്ങള്‍ തമ്മില്‍ ശത്രുതയുണ്ടാക്കുന്ന പ്രവര്‍ത്തനങ്ങളിലേര്‍പ്പെടല്‍) എന്നീ വകുപ്പുകളാണ് ചുമത്തിയിരിക്കുന്നത്.