കൂത്തുപറമ്പ്: കൂത്തുപറമ്പില്‍ കഞ്ചാവ് പിടികൂടിയതുമായി ബന്ധപ്പെട്ട പൊലിസ് അന്വേഷണം ഊര്‍ജിതമാക്കി.
ഇതോടെ ഈ കേസില്‍ കൂടുതല്‍ പേര്‍ വലയിലാകുമെന്നാണ് സൂചന. കഴിഞ്ഞ ദിവസം രണ്ടര കിലോ കഞ്ചാവുമായി നാലു പേര്‍ കൂത്തുപറമ്പില്‍ അറസ്റ്റിലായിരുന്നു.
മൂര്യാട്ടെ പി.വി.നിജാസ് (24), കരേറ്റയിലെ ടി.വി.മുബഷീര്‍ (25), തൃക്കണ്ണാപുരത്തെ കെ.സി.ആദര്‍ശ് (21), കൈതേരിയിലെ കെ.മുഹമ്മദ് റാഷിദ് (25) എന്നിവരാണ് അറസ്റ്റിലായത് .തലശേരി എ.എസ്.പി. അരവിന്ദ് സുകുമാര്‍, കൂത്തുപറമ്പ് സി.ഐ.ബി.രാജേന്ദ്രന്‍, എസ്.ഐ റഫീഖ്, എസ്.പി.യുടെ സ്‌പെഷ്യല്‍ സ്‌ക്വാഡംഗങ്ങള്‍ തുടങ്ങിയവര്‍ ഉള്‍പ്പെട്ട പൊലിസ് സംഘം നടത്തിയ ഊര്‍ജിത അന്വേഷണത്തിലാണ് ഇവര്‍ പിടിയിലായത്. വില്‍പ്പനക്കാരായവര്‍ക്ക് കഞ്ചാവെത്തിച്ചു കൊടുക്കുന്ന വന്‍ സംഘത്തെ കണ്ടെത്താനുള്ള ശ്രമത്തിലാണ് പൊലിസ്.
പ്രധാനമായും സ്‌കൂള്‍ വിദ്യാര്‍ഥികളെ ലക്ഷ്യമിട്ടാണ് കഞ്ചാവ് വില്‍പന സംഘം പ്രവര്‍ത്തിക്കുന്നത്.
അതു കൊണ്ട് തന്നെ സ്‌കൂള്‍ പരിസരങ്ങളിലും പൊലിസ് നിരീക്ഷണം ഏര്‍പ്പെടുത്തിയിട്ടുണ്ട്. കഴിഞ്ഞ ദിവസം അറസ്റ്റിലായ നാലു പ്രതികളേയും കൂത്തുപറമ്പ് ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റു കോടതി റിമാന്‍ഡ് ചെയ്തു.