മണ്ണാര്‍ക്കാട് നഗരത്തിലേക്ക് കഞ്ചാവ് കടത്തിയ ഏജന്റിനെ പൊലിസ് പിടികൂടി. ചിറക്കല്‍പ്പടിയില്‍ നിന്ന്  വെള്ളിയാഴ്ച്ച വൈകീട്ട് 6 മണിയോടെയാണ് മിന്നല്‍ പരിശോധനയില്‍ മണ്ണാര്‍ക്കാട് എസ്.ഐ ഷിജു.ടി.എബ്രഹാമിന്റെ നേതൃത്വത്തില്‍ പൊലിസ് സംഘം കഞ്ചാവ് ശേഖരം പിടിച്ചെടുത്തത്. പൊളിത്തീന്‍ ഭാഗില്‍ സൂക്ഷിച്ചിരുന്ന ഒരു കിലോ 350 ഗ്രാം വരുന്ന കഞ്ചാവാണ് കണ്ടെടുത്തത്. സംഭവവുമായി ബന്ധപ്പെട്ട് കുമരംപുത്തൂര്‍ പള്ളിക്കുന്ന് സ്വദേശി പുന്നപ്പാടത്ത് വീട്ടില്‍ മാധവന്‍കുട്ടിയെ പൊലിസ് അറസ്റ്റ് ചെയ്തു. അനിയന്ത്രിതമായി നഗരത്തിലും പരിസര പ്രദേശങ്ങളിലും ലഹരി വസ്തുക്കളുടെ അതിപ്രസരമുണ്ടായ സാഹചര്യത്തിലാണ് പൊലിസ് മിന്നല്‍ പരിശോധനയ്ക്കിറങ്ങിയത്.  തമിഴ്‌നാട്ടില്‍ നിന്നാണ് കഞ്ചാവ് നഗരത്തിലേക്ക് കടത്തിയതെന്ന് പ്രതി പൊലിസിന് മൊഴി നല്‍കിയിട്ടുണ്ട്. മണ്ണാര്‍ക്കാട് ഭാഗത്തേക്ക് സഞ്ചരിച്ചിരുന്ന ലൈന്‍ ബസിലാണ് പ്രതി യാത്ര ചെയ്തിരുന്നത്. എസ്.ഐ ഷിജു എബ്രഹാമിന്റെ നേതൃത്വത്തില്‍ എ.എസ്.ഐ നാരായണന്‍കുട്ടി, സി.പി.ഒ മാരായ റഫീഖ്, ശ്യം, കൃഷ്ണദാസ്, ജയകൃഷ്ണന്‍ തുടങ്ങിയവരാണ് പരിശോധനസംഘത്തിലുണ്ടായിരുന്നത്.