മലപ്പുറം: ജില്ലാ മുസ്‌ലിം ലീഗ് കമ്മിറ്റിയുടെ നേതൃത്വത്തില്‍ മലപ്പുറം ജില്ലയുടെ സുവര്‍ണ ജൂബിലി ആഘോഷങ്ങള്‍ക്കു 23നു തുടക്കമാകും. ഒരു വര്‍ഷം നീണ്ടുനില്‍ക്കുന്ന വിവിധ പരിപാടികളുടെ ഉദ്ഘാടനം സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും.
ജൂബിലി ആഘോഷ ലോഗോ ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി പ്രകാശനം ചെയ്യും. ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ എം.പി മുഖ്യപ്രഭാഷണം നടത്തും. ട്രഷറര്‍ പി.വി അബ്ദുല്‍ വഹാബ് എം.പി മുഖ്യാതിഥിയാകും. ജില്ലയിലെ മുഴുവന്‍ എം.എല്‍.എമാരും സംബന്ധിക്കും.
'മലപ്പുറം ജില്ലാ രൂപീകരണത്തിന്റെ രാഷ്ട്രീയം', 'മുസ്‌ലിം ലീഗും മലപ്പുറം ജില്ലയും' എന്നീ വിഷയങ്ങളില്‍ എം.സി വടകരയും സി.പി സൈതലവിയും പ്രഭാഷണം നടത്തും.
23ന് ഉച്ചയ്ക്കു രണ്ടിനു മലപ്പുറം വാരിയന്‍കുന്നത്ത് ടൗണ്‍ ഹാളിലാണ് പരിപാടി. ഗോള്‍ഡന്‍ ജൂബിലി ആഘോഷത്തിന്റെ ഭാഗമായി നടത്തുന്ന തുടര്‍പരിപാടികള്‍ ഉദ്ഘാടന സമ്മേളനത്തില്‍ പ്രഖ്യാപിക്കും.