ന്യൂഡല്‍ഹി: കൊവിഡ് പശ്ചാത്തലത്തില്‍ കശ്മീരില്‍ 4ജി ഇന്റര്‍നെറ്റ് സര്‍വിസ് പുനര്‍സ്ഥാപിക്കണമെന്ന ഹരജിയില്‍ വാദം പൂര്‍ത്തിയായി.
കേസ് ജസ്റ്റിസുമാരായ എന്‍.വി രമണ, സൂര്യകാന്ത്, ബി.ആര്‍ ഗവായ് എന്നിവരടങ്ങിയ ബെഞ്ച് വിധിപറയാന്‍ മാറ്റി. ഫൗണ്ടേഷന്‍ ഓഫ് മീഡിയ പ്രഫഷണല്‍സ്, ജമ്മു കശ്മീര്‍ പ്രൈവറ്റ് സ്‌കൂള്‍സ് അസോസിയേഷന്‍, സോയിബ് ഖുറേഷി എന്നിവരാണ് ഹരജിക്കാര്‍.
4ജി സര്‍വിസില്ലാത്തത് കശ്മീരില്‍ കൊവിഡ് പ്രതിരോധ പ്രവര്‍ത്തനത്തെ കാര്യമായി ബാധിച്ചിട്ടുണ്ടെന്ന് ഫൗണ്ടേഷന്‍ ഓഫ് മീഡിയ പ്രഫഷണല്‍സിന് വേണ്ടി ഹാജരായ അഭിഭാഷകന്‍ ഹുസേഫ അഹമ്മദി ചൂണ്ടിക്കാട്ടി. വീഡിയോ കാണുന്നതിനും വീഡിയോ കോണ്‍ഫറന്‍സുകള്‍ക്കും 4ജി വേണം.
കോടതിയില്‍ കേസുകള്‍ കേള്‍ക്കുന്നത് വീഡിയോ കോണ്‍ഫറന്‍സ് വഴിയാണ്.
2ജി സ്പീഡില്‍ ആരോഗ്യസേതു ആപ്പുപോലും പ്രവര്‍ത്തിക്കില്ലെന്നും ഹുസേഫ വാദിച്ചു. സ്പീഡ് കുറവുണ്ടായിട്ടും കശ്മീരില്‍ ആരോഗ്യമേഖയിലെ പ്രവര്‍ത്തനങ്ങള്‍ നടക്കുന്നുണ്ടെന്നായിരുന്നു സോളിസിറ്റര്‍ ജനറല്‍ തുഷാര്‍ മേത്തയുടെ വാദം.