കുറുപ്പന്തറ: മാഞ്ഞൂര്‍ പോലീസ് സ്റ്റേഷന്‍ പ്രവര്‍ത്തനമാരംഭിക്കുന്നതു സംബന്ധിച്ച് സംസ്ഥാന പോലീസ് മേധാവി സമര്‍പ്പിച്ചിട്ടുള്ള പ്രൊപ്പോസല്‍ മുന്‍ഗണനാക്രമത്തില്‍ സര്‍ക്കാര്‍ പരിശോധിച്ചുവരികയാണെന്ന് മുഖ്യമന്ത്രി പിണറായി വിജയന്‍ നിയമസഭയില്‍ വ്യക്തമാക്കി.
അഡ്വ. മോന്‍സ് ജോസഫ് എം.എല്‍.എ. ഉന്നയിച്ച സബ്മിഷനുള്ള മറുപടിയായിട്ടാണ് മുഖ്യമന്ത്രി ഇക്കാര്യം അറിയിച്ചത്. 29.09.2015 ലെ സര്‍ക്കാര്‍ ഉത്തരവു പ്രകാരം മാഞ്ഞൂര്‍ ഉള്‍പ്പെടെ 7 പോലീസ് സ്റ്റേഷനുകള്‍ ആരംഭിക്കുന്നതിന് സര്‍ക്കാര്‍ അനുമതി നല്‍കിയിരുന്നതായി മുഖ്യമന്ത്രി വ്യക്തമാക്കി. 08.01.2016 ലെ വിജ്ഞാപന പ്രകാരം മാഞ്ഞൂര്‍ പോലീസ് സ്റ്റേഷന്‍ അധികാര പരിധി നിര്‍ണ്ണയിച്ച് സര്‍ക്കാര്‍ വിജ്ഞാപനം പുറപ്പെടുവിച്ചിരുന്നെങ്കിലും പോലീസ് സ്റ്റേഷന്‍ പ്രവര്‍ത്തനമാരംഭിക്കുന്നതിന് ആവശ്യമായ അംഗബലം അനുവദിച്ചിരുന്നില്ല. നിര്‍ദ്ദിഷ്ട മാഞ്ഞൂര്‍ പോലീസ് സ്റ്റേഷന്റെ അധികാര പരിധി പുനര്‍നിര്‍ണ്ണയം ചെയ്യുന്നതിനും ആവശ്യമായ അംഗബലം അനുവദിക്കുന്നതിനുമായി സംസ്ഥാന പോലീസ് മേധാവി സമര്‍പ്പിച്ചിട്ടുള്ള റിപ്പോര്‍ട്ട് സര്‍ക്കാര്‍ പരിശോധിച്ച ശേഷം ആവശ്യമായ തീരുമാനം കൈക്കൊള്ളുമെന്ന് മുഖ്യമന്ത്രി മറുപടിയില്‍ ചൂണ്ടിക്കാട്ടി.
കുറുപ്പ ന്തറ കേന്ദ്രമായി സര്‍ക്കാര്‍ അനുവദിച്ചിട്ടുള്ള മാഞ്ഞൂര്‍ പോലീസ് സ്റ്റേഷന്‍ എത്രയും പെട്ടെന്ന് പ്രവര്‍ത്തനമാരംഭിക്കണമെന്ന് മോന്‍സ് ജോസഫ് എം.എല്‍.എ. ആവശ്യപ്പെട്ടു. വിസ്തൃതമായ അധികാര പരിധിമൂലം ഭരണനിര്‍വ്വഹണത്തില്‍ പ്രയാസപ്പെടുന്ന കടുത്തുരുത്തി പോലീസ് സ്റ്റേഷന്റെ പരിധി വിഭജിക്കേണ്ടത് അത്യന്താപേക്ഷിതമാണ്.