കൊട്ടാരക്കര: മാജിക്കിലൂടെ ലഹരി വിരുദ്ധ ബോധവല്‍ക്കരണം നടത്തി പൂയപ്പള്ളി ഗവ:ഹൈസ്‌കൂളിലെ സ്റ്റുഡന്റ് പൊലിസ് കേഡറ്റുകള്‍.
ലഹരി സമൂഹത്തിനും കുടുംബത്തിനും വ്യക്തി ജീവിതത്തിനും വരുത്തുന്ന ദുരിതങ്ങള്‍ അക്കമിട്ട് നിരത്താനും അത് കുട്ടിമനസ്സുകളില്‍ അരക്കിട്ടുറപ്പിക്കാനും ഉതകുന്ന വിധത്തിലാണ് ബോധവല്‍കരണത്തെ മാജിക്കുമായി കൂട്ടിയിണക്കി അവതരിപ്പിച്ചത്.വെളിയം ബ്ലോക്ക് റിസോഴ്‌സ് സെന്ററിലെ ട്രെയിനര്‍ ശാന്തകുമാറാണ് കേഡറ്റുകളെ പരിശീലിപ്പിക്കുന്നത്.
സ്‌കൂള്‍ ഓഡിറ്റോറിയത്തില്‍ നടന്ന ചടങ്ങ് എഴുകോണ്‍ സി.ഐ അനില്‍കുമാര്‍.റ്റി ഉദ്ഘാടനം ചെയ്തു. സ്റ്റുഡന്റ് പൊലീസ് ചുമതലക്കാരനായിരുന്ന മുന്‍ സര്‍ക്കിള്‍ ഇന്‍സ്‌പെക്ടര്‍ സി.ജോണിന് ചടങ്ങില്‍ യാത്രയയപ്പ് നല്‍കി. സ്റ്റുഡന്റ് പൊലീസ് കേഡറ്റുകളുടെ സ്വയം തൊഴില്‍ യൂണീറ്റായ ചവിട്ടുപായ നിര്‍മ്മാണ പദ്ധതിയും ഉദ്ഘാടനം ചെയ്തു. സിവില്‍ പൊലിസ് ഓഫീസര്‍ ഒ.ജോണ്‍സണ്‍ അധ്യക്ഷനായി. പ്രഥമാധ്യാപിക കെ.പി.ഗീതാകുമാരി,എസ്.ഐ ഐ.ഫറോസ്, കോട്ടാത്തല ശ്രീകുമാര്‍,സ്റ്റാഫ് സെക്രട്ടറി ഡി.കെ.ഷിബു,അധ്യാപകരായ മധുകുമാര്‍,ലേഖ,ആശ,അനിത,വിജയമ്മ,മേഴ്‌സി,സി.പി.ഒ മാരായ വി.റാണി,എ.എന്‍.ഗിരിജ എന്നിവര്‍ പങ്കെടുത്തു.