കോട്ടയം: ജില്ലയില്‍ വീണ്ടും ഗുണ്ടാ വേട്ട.പ്രമുഖ ഗുണ്ടാ നേതാവായ അരുണ്‍ ഗോപന്റെ കൂട്ടാളികളായ നാലുപേര്‍ ഇന്നലെ പൊലിസ് പിടിയിലായി . ഷൈമോന്‍( 26 ), തനു ജോസഫ്( 28), ജോഷി( 33 ), പ്രജീഷ്  (26) എന്നിവരാണ് ഇന്നലെ പൊലിസ് പിടിയിലായത്. സംക്രാന്തി ,കുമാരനല്ലുര്‍ എന്നിവടങ്ങളില്‍ നിന്നാണ് പ്രതികളെ പിടികൂടിയതെന്ന് പൊലിസ് പറഞ്ഞു.
അരുണ്‍ ഗോപന്റെ  എതിര്‍ സംഘത്തില്‍പെട്ട കുമാരനെല്ലൂര്‍ പൊട്ടങ്ങയില്‍ വിനോദിനെ എസ്.എച്ച് മൗണ്ട് ഭാഗത്ത് വെച്ച് കാര്‍ ഇടിപ്പിച്ച ശേഷം കമ്പി വടിക്ക് അടിക്കുകയും തുടര്‍ന്ന് മൊബൈല്‍ ഫോണും പണവും കവര്‍ന്ന  കേസിലാണ് ഇവരെ അറസ്റ്റ് ചെയ്തത്. കഴിഞ്ഞ ആഴ്ച്ച നടന്ന സംഭവത്തില്‍ ഇവരെ പൊലിസ് അന്വേഷിച്ചു വരികയായിരുന്നു.
ജില്ലയിലെ ഗുണ്ടാ വിരുദ്ധ സ്‌ക്വാഡിന്റെ പ്രവര്‍ത്തനം ശക്തമാക്കിയതിനെ തുടര്‍ന്ന് ഗുണ്ടാ നേതാവായ അരുണ്‍ ഗോപന്‍ കഴിഞ്ഞ ദിവസം പിടിയിലായിരുന്നു.നിരവധി ക്രിമിനല്‍ കേസുകളിലും കഞ്ചാവ് കേസുകളിലും പ്രതികളായ ഇവര്‍ നിരവധി കുറ്റകൃത്യങ്ങളില്‍ അരുണ്‍ഗോപന്റെ സഹായികളായി പ്രവര്‍ത്തിച്ചിരുന്നവരാണെന്ന് പൊലിസ് പറഞ്ഞു.
ജില്ലാ പൊലിസ് മേധാവി എന്‍. രാമചന്ദ്രന്റെ നേതൃത്വത്തില്‍ കോട്ടയം ഡി.വൈ.എസ്.പി ഗിരീഷ് പി .സാരഥി, ഗാന്ധിനഗര്‍ എസ്.ഐ അജിത് കുമാര്‍, ഷാഡോ പൊലിസ് ടീം അംഗങ്ങളായ അജിത്,ബിജുമോന്‍ നായര്‍, ഷിബുകുട്ടന്‍ ,സജികുമാര്‍, വര്‍ഗീസ് , ഷിജിമോന്‍, ശ്യാം,ബൈജു എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.