തിരുവനന്തപുരം: വ്യാഴാഴ്ച മുതല്‍ പ്രവാസികള്‍ സംസ്ഥാനത്ത് എത്തുന്ന സാഹചര്യത്തില്‍ മുന്നൊരുക്കങ്ങള്‍ വിലയിരുത്താന്‍ മുഖ്യമന്ത്രിയുടെ നേതൃത്വത്തില്‍ ഇന്ന് ഉന്നതതല യോഗം ചേരും. രണ്ടു ലക്ഷത്തിലധികം ആളുകളെ സ്വീകരിക്കാനുള്ള സൗകര്യം ഇതിനോടകം തന്നെ ഒരുക്കിയിട്ടുണ്ട്. തദ്ദേശവകുപ്പിന്റെ നേതൃത്വത്തിലാണ് ഒരുക്കങ്ങള്‍ ക്രമീകരിക്കുന്നത്.

ഒരുക്കങ്ങള്‍ വിലയിരുത്താന്‍ പത്തുമണിക്ക് ചേരുന്ന യോഗത്തില്‍ ഉദ്യോഗസ്ഥരും മന്ത്രിമാരും പങ്കെടുക്കും.പണം മുടക്കാന്‍ തയ്യാറുള്ള പ്രവാസികളെ സ്വകാര്യ ആശുപത്രികളില്‍ പ്രവേശിപ്പിക്കാന്‍ സര്‍ക്കാര്‍ അനുവദിച്ചേക്കും.ചികില്‍സാ, ക്വാറന്റീന്‍ സൗകര്യങ്ങളൊരുക്കാന്‍ സ്വകാര്യ ആശുപത്രികളെ കൂടി ഉള്‍പ്പെടുത്തും. ഇതിനായി ആശുപത്രി മാനേജ്‌മെന്റുകളുമായി വീഡിയോ കോണ്‍ഫറന്‍സ് വഴി ചര്‍ച്ച നടത്തും.

അതത് രാജ്യങ്ങളില്‍ പരിശോധന നടത്തുമെങ്കിലും ഡിജിറ്റല്‍ പാസ് അടക്കമുള്ള സംവിധാനമൊരുക്കി കര്‍ശന നിരീക്ഷണം നടത്താനാണു സര്‍ക്കാര്‍ ശ്രമം.വിമാനത്താവളങ്ങളില്‍ പരിശോധന നടത്തി കൊവിഡ് കെയര്‍ ഹോമുകളിലെത്തിക്കുകയും, ഫലം നെഗറ്റീവ് ആയാല്‍ വീടുകളില്‍ ക്വാറന്റീന്‍ അനുവദിക്കുകയും ചെയ്യാനാണ് സംസ്ഥാന സര്‍ക്കാര്‍ ഉദ്ദേശിക്കുന്നത്.

വീടുകളിലേക്ക് മടങ്ങാനുള്ള സ്വകാര്യ വാഹനത്തില്‍ ഡ്രൈവറെ മാത്രമേ അനുവദിക്കുകയുള്ളു. കൂടാതെ വിമാനത്താവളം മുതല്‍ വീട് വരെ പൊലീസിന്റെ നിരീക്ഷണമുണ്ടാകും. ജില്ലാ പൊലീസ് മേധാവിമാരുടെ നേതൃത്വത്തില്‍ ഡിവൈഎസ്പിമാര്‍ക്കായിരിക്കും നിരീക്ഷണ ചുമതല.

കേന്ദ്ര സര്‍ക്കാര്‍ നിര്‍ദേശിച്ച 14 ദിവസം ക്വാറന്റീന് പുറമേ ഹൈറിസ്‌ക് മേഖലകളില്‍ നിന്നാണ് വരുന്നതെങ്കില്‍ 28 ദിവസം ക്വാറന്റീനില്‍ വിടുന്ന കാര്യവും സര്‍ക്കാര്‍ ആലോചിക്കുന്നുണ്ട്.ഇവ സംബന്ധിച്ചുള്ള കാര്യങ്ങള്‍ ഇന്നത്തെ ഉന്നതതല യോഗത്തില്‍ ചര്‍ച്ചയാകും.