കാസര്‍കോട്: മഞ്ചേശ്വരം എം.എല്‍.എ പി.ബി അബ്ദുറസാഖിന്റെ സഞ്ചാരവഴികളില്‍ ഇനി മണ്ഡലത്തില്‍ അദ്ദേഹത്തിനു ലഭിച്ച ഭൂരിപക്ഷവും കൂടെയുണ്ടാകും. തെരഞ്ഞെടുപ്പില്‍ ലഭിച്ച ഭൂരിപക്ഷമായ 89 ആണ് അദ്ദേഹത്തിന്റെ കാറിന്റെ നമ്പറും.
നിയമസഭാ തെരഞ്ഞെടുപ്പില്‍ ഇഞ്ചോടിഞ്ചു പൊരുതിയാണ് അബ്ദുറസാഖ് മഞ്ചേശ്വരത്തു വിജയിച്ചത്. കേരളം ഉറ്റുനോക്കിയ മണ്ഡലമായിരുന്നു ഇത്. വിജയം സുനിശ്ചിതമെന്ന് ബി.ജെ.പി ഉറച്ചുവിശ്വസിക്കുകയും ചെയ്തു. എന്നാല്‍ അവരുടെ പ്രതീക്ഷകളെയെല്ലാം അസ്ഥാനത്താക്കി യു.ഡി.എഫ് സ്ഥാനാര്‍ഥി മുസ്‌ലിംലീഗിലെ അബ്ദുറസാഖ് 89 വോട്ടിന്റെ ഭൂരിപക്ഷത്തിനു വിജയിക്കുകയായിരുന്നു.
അണികളുടെ നിര്‍ബന്ധത്തിന് വഴങ്ങിയാണു പുതിയ ഇന്നോവ കാറിന് അദ്ദേഹം കെ.എല്‍ 14 ടി. 89 എന്ന നമ്പര്‍ സ്വന്തമാക്കി പതിച്ചത്. 1000, 89 എന്നീ രണ്ടു നമ്പറുകളാണ് പുതിയ കാറിനുവേണ്ടി അദ്ദേഹം കണ്ടുവച്ചിരുന്നത്. ഇതില്‍ 89 നമ്പര്‍ തന്നെ സ്വീകരിക്കണമെന്നു ബന്ധുക്കളും മുസ്‌ലിംലീഗ് പ്രവര്‍ത്തകരും സുഹൃത്തുക്കളും നിര്‍ബന്ധം പിടിക്കുകയായിരുന്നു. ചൊവ്വാഴ്ച രാവിലെയാണ് എം.എല്‍.എക്ക് നമ്പര്‍ അനുവദിച്ചത്.