തൊടുപുഴ:  ക്രൈസ്തവരുടെ വിശുദ്ധവാരാചരണത്തിനു തുടക്കംകുറിച്ചു ഇന്ന് ഓശാന ഞായര്‍ ആഘോഷിക്കും. യേശുക്രിസ്തുവിനെ ഒലിവിന്‍ ചില്ലകള്‍ വീശിയും വസ്ത്രങ്ങള്‍ വഴിയില്‍ വിരിച്ചും ജറുസലം വീഥിയിലൂടെ രാജാവിനെപ്പോലെ ആനയിച്ചതിന്റെ ഓര്‍മയാണ് ഓശാന ഞായറാഴ്ച ആചരിക്കുന്നത്. എല്ലാ ക്രൈസ്തവ ദേവാലയങ്ങളിലും ഇന്ന് രാവിലെ കുരുത്തോല വെഞ്ചരിപ്പും വിതരണവും നടക്കും. ഇനിയുള്ള ഒരാഴ്ച ചര്‍ച്ചുകളില്‍ ആഴ്ചയുടെ വിശുദ്ധവാരാചരണത്തിന്റെ ഭാഗമായി പ്രത്യേക കര്‍മങ്ങളും ഉണ്ടാകും. വ്യാഴാഴ്ച യേശുവിന്റെ ഒടുവിലത്തെ അത്താഴത്തിന്റെ ഓര്‍മ അനുസ്മരിച്ചു പെസഹായും യേശുക്രിസ്തു പീഡകളേറ്റതിന്റെ ഓര്‍മയില്‍ ദുഃഖവെള്ളി ആചരണവും നടക്കും. അന്‍പതു ദിവസം നീണ്ട നോമ്പിന്റെ സമാപനംകുറിച്ചു ഞായറാഴ്ച യേശുവിന്റെ ഉയിര്‍പ്പു തിരുനാളായ ഈസ്റ്റര്‍ ആഘോഷിക്കും.