മാനന്തവാടി: പ്രളയത്തില്‍ നെല്‍കൃഷി നശിച്ചതിനെ തുടര്‍ന്ന് കൃഷി ഭവന്‍ നല്‍കിയ നെല്‍വിത്ത് ഉപയോഗിച്ച് രണ്ടാമത് കൃഷി ഇറക്കിയ പാടത്ത് വിളവടുത്തപ്പോള്‍ രോഗബാധ.
എടവക പഞ്ചായത്തിലെ പായോട് പാടശേഖരത്തിലെ 3.5 ഏക്കര്‍ സ്ഥലത്തെ നെല്‍കൃഷിയാണ് നശിച്ചത്. വിളവെടുപ്പിന് സമയമായപ്പോഴാണ് രോഗം ബാധിച്ച് നെല്ല് പൂര്‍ണമായും നശിച്ചത്. വിവരം അറിഞ്ഞ് കൃഷി വകുപ്പ് ഉദ്യോഗസ്ഥര്‍ സ്ഥലം സന്ദര്‍ശിച്ചു. സ്വന്തം പണി കൂടാതെ 75,000 രൂപ മുടക്കിയാണ് കൃഷി ഇറക്കിയത്. നെല്ലിന് പകരം പതിരാണ് കതിരുകളില്‍ അവശേഷിക്കുന്നത്. ആളെ കൂലിക്ക് വിളിച്ച് കൊയ്ത്ത് നടത്തിയാല്‍ അതിന്റെ മുടക്ക് തുക പോലും നെല്ലില്‍ നിന്ന് കിട്ടില്ല എന്നതാണ് അവസ്ഥ.
ഇന്‍ഷുര്‍ ചെയ്‌തെങ്കിലും അതിന്റെ നഷ്ടപരിഹാരവും ലഭിച്ചിട്ടില്ല. പ്രളയത്തില്‍ കൃഷി നശിച്ചതിനാല്‍ രണ്ടാമത് നട്ട നെല്ല് വൈകിയാണ് വിളഞ്ഞത്. അതുകൊണ്ട് തന്നെ കൊയ്ത്ത് മെതി യന്ത്രവും ലഭിക്കാനുമില്ല. സമീപത്ത് തന്നെ ഒരേക്കര്‍ സ്ഥലത്തെ നെല്ലും കൊയ്ത്തിന് പാകമായിട്ടുണ്ട്.
ഇവിടെയും വെയിലിന് കാഠിന്യം ഏറിയതിനാല്‍ തൊഴിലാളികളെ ഉപയോഗിച്ച് കൊയ്യാന്‍ സാധിക്കില്ല.
കൃഷി വകുപ്പിന്റെ സഹായം അടിയന്തരമായി ലഭിച്ചില്ലെങ്കില്‍ കൊയ്ത്ത് നടത്താതെ കൃഷി ഉപേക്ഷിക്കുമെന്നാണ് കര്‍ഷകനായ കെ.പി. ബിജു പറയുന്നത്. എത്രയും വേഗം കൊയ്ത്ത് യന്ത്രം എത്തിച്ച് നല്‍കുമെന്ന് സ്ഥലം സന്ദര്‍ശിച്ച ജില്ലാതല ഉദ്യോഗസ്ഥര്‍ ഉറപ്പ് നല്‍കിയിട്ടുണ്ട്.