പുത്തനത്താണി: രൂക്ഷമായ കുടിവെള്ള ക്ഷാമത്തില്‍ പൊറുതി മുട്ടി കല്‍പകഞ്ചേരി പൊലിസ് സ്റ്റേഷനും. മുന്‍ കാലങ്ങളില്‍ കുടിവെള്ളത്തിന്  സ്റ്റേഷന്‍ വളപ്പിലെ കിണറില്‍ നിന്നും ഇത്തിരി വെള്ളമെങ്കിലും ലഭിച്ചിരുന്നു. ആ വെള്ളവും പൂര്‍ണ്ണമായും വറ്റിയിരിക്കുകയാണിപ്പോള്‍. ഇതോടെ കുടിവെള്ളം പോലും മുട്ടിയിരിക്കയാണ്. അത്യാവശ്യത്തിനുള്ള വെള്ളത്തിനു പോലും പുറത്തുള്ള സംവിധാനങ്ങളെ ആശ്രയിക്കേണ്ട അവസ്ഥയാണ്. വിവിധ കേസുകളില്‍ പിടിയിലാകുന്ന പ്രതികള്‍ക്ക് പ്രാഥമിക ആവശ്യങ്ങള്‍ക്കുള്ള വെള്ളവും കൂടി ചുമന്ന് കൊണ്ടുവന്ന് കൊടുക്കേണ്ട ഗതികേടിലാണ് പൊലിസ്. കൂടാതെ പൊലിസ് ക്വാര്‍ട്ടേഴ്‌സിലും വെള്ളമില്ല. ഈ സാഹചര്യത്തില്‍ ക്വാര്‍ട്ടേഴ്‌സും ഒഴിഞ്ഞ് പോകേണ്ടിവരും. നിലവിലെ കിണര്‍ മണ്ണെടുത്താല്‍ പരിഹരിക്കാവുന്ന പ്രശ്‌നം മാത്രമെ ഇപ്പോഴുള്ളൂ. എന്നാല്‍ ബന്ധപ്പെട്ട മേലധികാരികള്‍ കനിയണമെന്നു മാത്രം.