വണ്ടൂര്‍: നാലുവരിപ്പാതയുടെ ഓവുചാല്‍ പണി പ്ലാനില്‍ കാണിച്ച രീതിയിലല്ലെന്നാരോപിച്ച് പണി നാട്ടുകാര്‍ തടഞ്ഞു. അങ്ങാടിയില്‍ റോഡ് ആരംഭിക്കുന്ന ഭാഗത്ത് പഞ്ചായത്ത് ഉടമസ്ഥതയിലുള്ള കെട്ടിടത്തിന്റെ മുന്‍വശത്തുകൂടി ഓവുചാല്‍ നിര്‍മിക്കാനുള്ള ശ്രമമാണ് നാട്ടുകാര്‍ സംഘടിച്ചെത്തി തടഞ്ഞത്. നേരത്തെയുള്ള പ്ലാനില്‍ നിലവിലെ കെട്ടിടം പൊളിച്ചു മാറ്റിയുള്ള ഓവുചാല്‍ നിര്‍മാണമാണ് കാണിച്ചിരുന്നത്. എന്നാല്‍ നിലവില്‍ പൊതുമാരമത്ത് ഈ ഭാഗത്ത് മാത്രം വീതി കുറച്ച്, കെട്ടിടത്തിനു മുന്നിലൂടെ ഓവുചാല്‍ നിര്‍മിക്കാനാണ് ശ്രമിക്കുന്നതെന്നായിരുന്നു പ്രതിഷേധക്കാരുടെ ആരോപണം.
മണ്ണുമാന്തി യന്ത്രമുള്‍പ്പെടെയുള്ളവയുമായെത്തിയ പൊതുമാരാമത്ത് വകുപ്പധികൃതര്‍ പ്രതിഷേധത്തെ തുടര്‍ന്ന് മടങ്ങി. നേരത്തെ ഈ കെട്ടിടത്തിലെ കൈയേറ്റമൊഴിപ്പിച്ചതുമായി ബന്ധപെട്ട വിവാദം നിലനിന്നിരുന്നു. സംഭവത്തില്‍ പഞ്ചായത്ത് പ്രസിഡന്റടക്കമുള്ളവരെ പ്രതി ചേര്‍ത്ത് കെട്ടിടത്തിലെ കടയുടമകള്‍ നല്‍കിയ പരാതിയിലെ കേസ് ഇപ്പോള്‍ കോടതിയുടെ പരിഗണനയിലാണ്.