ദമ്മാം: യമനില്‍ വെള്ളിയാഴ്ചയുണ്ടായ സംഘര്‍ഷത്തില്‍ 17 ഹൂത്തികള്‍ കൊല്ലപ്പെട്ടു. നിരവധി പേര്‍ക്ക് പരുക്കേല്‍ക്കുകയും ചെയ്തു. യമനിലെ സര്‍ക്കാര്‍ വിരുദ്ധ പ്രക്ഷോഭകരായ ഇറാന്‍ അനുകൂല ഹൂത്തികളും യമനിലെ സര്‍ക്കാറിനെ സഹായിക്കുന്ന അറബ് സഖ്യവും തമ്മിലുള്ള സംഘര്‍ഷത്തിലാണ് ഇവര്‍ കൊല്ലപ്പെട്ടത്.

യമനിലെ തായിസ് പ്രവിശ്യയിലെ പടിഞ്ഞാറ് മേഖലയിലെ തുറമുഖത്താണ് സംഘര്‍ഷം നടന്നത്. വ്യാഴാഴ്ച ഹൂത്തികള്‍ മരിബ് പട്ടണത്തിനു സമീപത്തെ ജനവാസ കേന്ദ്രത്തിലേക്ക് നടത്തിയ റോക്കറ്റാക്രമണത്തില്‍ ഏഴു കുട്ടികള്‍ കൊല്ലപ്പെട്ടിരുന്നു.

യമനിലെ സംഘര്‍ഷത്തില്‍ അറബ് സഖ്യസേന യുദ്ധം ആരംഭിച്ച 2015 മാര്‍ച്ച് മുതല്‍ ഇതുവരെ 6,400 ആളുകള്‍ കൊല്ലപ്പെട്ടതായും ഏകദേശം 30,000 ആളുകള്‍ക്ക് പരുക്കേറ്റതുമായാണ് യു.എന്‍ കണക്ക്. കുവൈത്തിന്റെ നേതൃത്വത്തില്‍ സമാധാന ചര്‍ച്ചകള്‍ രണ്ടു മാസമായി കുവൈത്തില്‍ തുടരുകയാണ്. പെരുന്നാളിനോടനുബന്ധിച്ചു നിര്‍ത്തിവെച്ച സമാധാന ചര്‍ച്ചകള്‍ ജൂലൈ 15 മുതല്‍ തുടരും.