പട്ടാമ്പി: ടൗണിലെ വിവിധ സ്ഥലങ്ങളിലായി മഞ്ഞപ്പിത്തം പടരുന്ന സാഹചര്യത്തില്‍ രോഗം പടരുന്നതിനുള്ള കാരണം കണ്ടെത്താന്‍ ആരോഗ്യവകുപ്പിന്റെ പരിശോധന തുടങ്ങി. പട്ടാമ്പിയിലിതുവരെ കുട്ടികളടക്കം 42 പേര്‍ക്കാണ് മഞ്ഞപ്പിത്തം സ്ഥിരീകരിച്ചിരിക്കുന്നതെന്ന് ജില്ലാ മെഡിക്കല്‍ ഓഫിസര്‍ ഡോ. കെ.പി റീത്ത അറിയിച്ചു. പ്രദേശത്തെ കുടിവെള്ളവും രോഗബാധിതരുടെ രക്തസാമ്പിളുമാണ് പരിശോധിക്കുന്നത്.
രോഗം പടരുന്നതിനുള്ള കാരണം ഇനിയും വ്യക്തമായിട്ടില്ലെന്ന് പരിശോധനാസംഘത്തിലുള്ള ഡെപ്യൂട്ടി ഡി.എം.ഒ ഡോ. കെ.എ നാസര്‍ വ്യക്തമാക്കി. അതേ സമയം ജില്ലയില്‍ മറ്റുഭാഗങ്ങളിലൊന്നും മഞ്ഞപ്പിത്തം സ്ഥിരീകരിച്ചിട്ടില്ല. രോഗം കൂടുതല്‍പേര്‍ക്ക് പകര്‍ന്ന സ്ഥലങ്ങളിലെ കുടിവെള്ളസാമ്പിള്‍ പരിശോധിക്കും. ഇതുവഴി രോഗംപടര്‍ന്ന സാഹചര്യം കണ്ടെത്തുമെന്ന് മെഡിക്കല്‍ ഓഫിസര്‍ പറഞ്ഞു.