മലപ്പുറം: പോളിയോ വാക്‌സിന്‍ കൊടുത്തതിനെത്തുടര്‍ന്ന് നിലമ്പൂര്‍ ചന്തക്കുന്നില്‍ ഒന്നര വയസുള്ള കുട്ടിയുടെ കാലുകള്‍ തളര്‍ന്നുവെന്ന വാര്‍ത്ത വാസ്തവവിരുദ്ധമാണെന്ന് ആരോഗ്യവകുപ്പ് അറിയിച്ചു. 2016 മെയ് 15നാണ് കുട്ടിയുടെ ഇടതുകാലിന് തളര്‍ച്ചയുണ്ടായത്. തുടര്‍ന്ന് ജൂണ്‍ ഒന്‍പതിന് കോട്ടക്കല്‍ മിംസ് ആശുപത്രിയില്‍ അഡ്മിറ്റ് ചെയ്യുകയും 10ന് ഡിസ്ചാര്‍ജ് ചെയ്യുകയും ചെയ്തിരുന്നു.

ഏപ്രില്‍ ആറിന് ഒന്നര വയസുവരെ നല്‍കേണ്ട കുത്തിവയ്പ്പുകള്‍ (ഡി.പി.ടി ആദ്യ ബൂസ്റ്റ് ഡോസും എം.എം.ആര്‍ വാക്‌സിനും) നല്‍കിയിട്ടുണ്ട്.

പോളിയോ തുള്ളിമരുന്ന് അവസാനം കൊടുത്തത് 2015 മാര്‍ച്ച് 18നാണ്. അതിനാല്‍ ഇപ്പോള്‍ കുട്ടിയുടെ കാലുകള്‍ക്കുണ്ടായ തളര്‍ച്ചയ്ക്കുകാരണം പോളിയോ വാക്‌സിന്‍ അല്ലെന്നു വ്യക്തമാണ്. അക്യൂട്ട് ഫ്‌ളാസിഡ് പരാലിസിസ് എന്ന വിഭാഗത്തില്‍ ഉള്‍പ്പെടുത്തി ഈ അവസ്ഥ നിരീക്ഷണത്തിലാണ്. കുട്ടിയുടെ മലം പരിശോധനയ്ക്കായി ബംഗളൂരുവിലെ നാഷണല്‍ ലാബില്‍ അയച്ചതായും ജില്ലാ മെഡിക്കല്‍ ഓഫിസര്‍ അറിയിച്ചു.