അഡൂര്‍ (കാസര്‍കോട്): വൃദ്ധ ദമ്പതികളെ റോഡരികിലെ കോണ്‍ക്രീറ്റ് പൈപ്പിനകത്ത് വിഷം കഴിച്ച് മരിച്ചനിലയില്‍ കണ്ടെത്തി. ഇടുക്കി തൊടുപുഴ സ്വദേശി തങ്കച്ചന്‍ എന്ന ജോര്‍ജ് (79), ഭാര്യ പൊന്നമ്മ (60) എന്നിവരെയാണ് മരിച്ച നിലയില്‍ കണ്ടത്. പള്ളഞ്ചി വെള്ളരിക്കയം പാലത്തിന് സമീപത്ത് ഇറക്കിയിട്ടിരുന്ന കൂറ്റന്‍ കോണ്‍ക്രീറ്റ് പൈപ്പിനുള്ളില്‍ ഇന്നലെ രാവിലെ 9.30 ഓടെയാണ് മരിച്ച നിലയില്‍ കണ്ടത്.

റബര്‍ ടാപ്പിങ് തൊഴിലാളികളായ ഇവര്‍ കുറ്റിക്കോല്‍ ചാടകം പുതിയ പറമ്പത്ത് താമസിച്ചു വരികയായിരുന്നു. കഴിഞ്ഞ ദിവസം വൈകുന്നേരം മൂന്നോടെ ഇരുവരും ബേത്തൂര്‍പാറയില്‍ ബസിറങ്ങി പള്ളഞ്ചി ഭാഗത്തേക്ക് നടന്നു പോകുന്നത് കണ്ടവരുണ്ട്. ഇവരുടെ കൈവശം പ്ലാസ്റ്റിക് സഞ്ചി ഉണ്ടായിരുന്നതായും പറയുന്നു. മൃതദേഹങ്ങള്‍ക്ക് സമീപം ഒരു വിഷക്കുപ്പിയും വെള്ളക്കുപ്പിയും കണ്ടെത്തിയിട്ടുണ്ട്. മൃതദേഹം പോസ്റ്റ്‌മോര്‍ട്ടത്തിനായി പരിയാരം മെഡിക്കല്‍ കോളജ് ആശുപത്രിയിലേക്ക് കൊണ്ടു പോയി. മരണം സംബന്ധിച്ച് ആദൂര്‍ പൊലിസ് അന്വേഷണമാരംഭിച്ചിട്ടുണ്ട്.