കൊണ്ടോട്ടി: ഇന്ത്യയില്‍ നിന്നുള്ള ഈ വര്‍ഷത്തെ ഹജ്ജ് സര്‍വിസുകള്‍ ജൂലൈ 14ന് ആരംഭിക്കും. കേന്ദ്ര വ്യോമയാന മന്ത്രാലയം പുറത്തിറക്കിയ ഹജ്ജ് വിമാന ഷെഡ്യൂള്‍ ഇന്നലെ മുഴുവന്‍ ഹജ്ജ് കമ്മിറ്റികള്‍ക്കും കൈമാറി. 

രണ്ട് ഘട്ടങ്ങളായി നടക്കുന്ന ഹജ്ജ് സര്‍വിസുകളില്‍ ആദ്യം ഒന്‍പത് എംബാര്‍ക്കേഷന്‍ പോയിന്റുകളില്‍ നിന്നും രണ്ടാംഘട്ടത്തില്‍ കേരളം ഉള്‍പ്പടെ 11 എംബാര്‍ക്കേഷന്‍ പോയിന്റുകളില്‍ നിന്നുമാണ് വിമാനങ്ങള്‍ പുറപ്പെടുക. ആദ്യഘട്ടത്തിലെ വിമാനങ്ങള്‍ മദീനയിലേക്കും രണ്ടാംഘട്ടത്തിലുള്ളവ ജിദ്ദയിലേക്കുമാണ് പുറപ്പെടുക. ആദ്യഘട്ടം ജൂലൈ 14ന് തുടങ്ങി 28ന് അവസാനിക്കും. കേരളം ഉള്‍പ്പെടുന്ന രണ്ടാംഘട്ടം ജൂലൈ 29നാണ് തുടങ്ങുന്നത്. കേരളത്തില്‍ നിന്നുള്ള ഹജ്ജ് സര്‍വിസുകള്‍ ഓഗസ്റ്റ് ഒന്നിനാണ് കൊച്ചിയില്‍ നിന്ന് ആരംഭിക്കുക.
ഡല്‍ഹി, ഗയ, ഗുവാഹത്തി, ലഖ്‌നൗ, ശ്രീനഗര്‍ എന്നിവിടങ്ങളില്‍ നിന്നാണ് ഈ വര്‍ഷത്തെ ആദ്യ ഹജ്ജ് വിമാനങ്ങള്‍ ജൂലൈ 14ന് പുറപ്പെടുക. കൊല്‍ക്കത്തയില്‍ നിന്ന് 17നും വരാണാസിയില്‍ നിന്ന് 20നും മംഗളൂരുവില്‍ നിന്ന് 21നും ഗോവയില്‍ നിന്ന് 26നും ആരംഭിക്കും. ഹജ്ജ് കഴിഞ്ഞുള്ള മടക്ക സര്‍വിസുകളും ഇവിടങ്ങളിലേക്കാണ് ആദ്യമുണ്ടാവുക. മടക്ക സര്‍വിസുകള്‍ ഓഗസ്റ്റ് 27ന് ആരംഭിച്ച് സെപ്റ്റംബര്‍ 12ന് അവസാനിക്കും.
രണ്ടാംഘട്ടം ജൂലൈ 29 മുതലാണ് ആരംഭിക്കുന്നത്. ഔറംഗബാദ്, ചെന്നൈ, മുംബൈ, നാഗ്പൂര്‍ എന്നിവിടങ്ങളില്‍ നിന്നാണ് 29ന് സര്‍വിസ് ആരംഭിക്കുക. റാഞ്ചിയില്‍ നിന്ന് 30ന് ആരംഭിക്കും. കൊച്ചി, അഹമ്മദാബാദ്, ബംഗളൂരു, ഹൈദരാബാദ്, ജയ്പൂര്‍ എന്നിവടങ്ങളില്‍ നിന്ന് ഓഗസ്റ്റ് ഒന്ന് മുതലാണ് സര്‍വിസ് ആരംഭിക്കുന്നത്. ഭോപ്പാലില്‍ നിന്ന് ഓഗസ്റ്റ് അഞ്ചിനും സര്‍വിസ് തുടങ്ങും. രണ്ടാഘട്ടത്തിലുള്ളവരുടെ മടക്ക സര്‍വിസുകള്‍ സെപ്റ്റംബര്‍ 12 ന് ആരംഭിക്കും. കേരളത്തില്‍ നിന്നുള്ള ഹജ്ജ് സംഘവും 12 മുതലാണ് മടങ്ങിയെത്തുക.