വടകര: സമസ്ത കേരള ജംഇയ്യത്തുല്‍ ഉലമ കോഴിക്കോട് ജില്ലാ കമ്മിറ്റിയുടെ ആഭിമുഖ്യത്തില്‍ നടക്കുന്ന വഴിവിളക്ക് നവോഥാന കാംപയിനിന്റെ ഭാഗമായുള്ള കുറ്റ്യാടി മണ്ഡലം ആദര്‍ശ സമ്മേളനം തിരുവള്ളൂരില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. നാളെ തിരുവള്ളൂര്‍ എ.സി അബ്ദുള്ള നഗറില്‍ വൈകിട്ട് മൂന്നിന് സമ്മേളനം ആരംഭിക്കും. വ്യക്തികളിലും കുടുംബത്തിലും മഹല്ലിലും ആശയപ്രചരണം, പ്രതിരോധം, വിദ്യാഭ്യാസ പ്രക്രിയ, ആത്മീയത, ദേശീയത, ധാര്‍മികബോധനം, ലഹരിമുക്തി, ആരോഗ്യസംരക്ഷണം, സാമൂഹ്യസേവനം എന്നിവയാണ് കാംപയിന്‍ ലക്ഷ്യമിടുന്നത്.
സമ്മേളനത്തിന്റെ ആദ്യ സെഷനില്‍ ഇസ്‌ലാമിനെ അടുത്തറിയുക എന്ന വിഷയത്തില്‍ അബ്ദുസമദ് പൂക്കോട്ടൂര്‍ പ്രഭാഷണം നടത്തും. ശൈഖുന കൊയ്യോട് ഉമര്‍ മുസലിയാര്‍ ഉദ്ഘാടനം ചെയ്യും. സി.എച്ച് മഹമൂദ് സഅദി ആമുഖ പ്രഭാഷണവും എം.ടി അബൂബക്കര്‍ ദാരിമി മുഖ്യപ്രഭാഷണവും നടത്തും. വാര്‍ത്താസമ്മേളനത്തില്‍ കണ്ണോത്ത് സൂപ്പി ഹാജി, ചിങ്ങാണ്ടി മൊയ്തു ഹാജി, ചിറക്കല്‍ ഹമീദ് മുസലിയാര്‍, സി.കെ കുഞ്ഞമ്മദ്, മുഹമ്മദ് തോടന്നൂര്‍, സി.എച്ച് അഷ്‌റഫ് പങ്കെടുത്തു.