തച്ചമ്പാറ : പോയ കാലത്തിന്റെ കാര്‍ഷിക സംസ്‌ക്കാരം വീണ്ടെടുക്കാനുള്ള ശ്രമത്തിന്റെ ഭാഗമായി തിരുവാതിര നാളുകളില്‍ നടത്തുന്ന ഞാറ്റുവേല ചന്തയ്ക്ക് തച്ചമ്പാറയില്‍ വെള്ളിയാഴ്ച തുടക്കം കുറിക്കും. തച്ചമ്പാറ ഗ്രാമ പഞ്ചായത്ത്, കൃഷി ഭവന്‍, ആത്മ സൊസൈറ്റി, വിവിധ കര്‍ഷക സമിതികള്‍ എന്നിവയുടെ നേതൃത്വത്തില്‍ തച്ചമ്പാറ ആത്മ ഇക്കോഷോപ്പിനു സമീപമാണ് ഞാറ്റുവേല ചന്ത നടത്തുന്നത്. വിവിധ തരം വാഴ വിത്തുകള്‍, കപ്പ തണ്ടുകള്‍, കിഴങ്ങ് വര്‍ഗ്ഗങ്ങള്‍, പച്ചക്കറി തൈകള്‍, കുരുമുളക് വള്ളികളും കൊടിത്തലകളും, തെങ്ങിന്‍ തൈകളുള്‍പ്പടെ എല്ലാ വിധ നടീല്‍ വസ്തുക്കളും ലഭിക്കും. നാട്ടില്‍ നീന്നും അന്യം നിന്നു പോയ പലതരം വിളകളുടെ തൈകളുടെ പ്രദര്‍ശനവും വില്പനയും ഉണ്ടാകും. ജനകീയാസൂത്രണ പദ്ധതിയില്‍ ഉള്‍പ്പെടുത്തി പഞ്ചായത്തിലെ വീട്ടുകാര്‍ക്ക് നല്കുന്ന ഗ്രാഫ്റ്റ് മാവിന്‍ തൈകള്‍, റംബുട്ടാന്‍ തൈകള്‍, കാസര്‍ഗോഡ് സി.പി.സി.ആര്‍.ഐയില്‍ നിന്നുള്ള കുള്ളന്‍ തെങ്ങിന്‍ തൈകള്‍ എന്നിവയുള്‍പ്പെടെയുള്ള നടീല്‍ വസ്തുക്കളുടെ വിതരണവും. കൃഷി വകുപ്പിന്റെ ഓണത്തിനൊരു മുറം പച്ചക്കറി പദ്ധതിയുടെ ഭാഗമായിട്ടുള്ള വിത്തുകളുടേയും പച്ചക്കറി തൈകളുടേയും വിതരണവും നടക്കും. വെള്ളിയാഴ്ച കാലത്ത് പത്ത് മണിക്ക് പഞ്ചായത്ത് പ്രസിഡന്റ് കെ.ടി.സുജാത ഉദ്ഘാടനം ചെയ്യും. വൈസ് പ്രസിഡന്റ് പി.എം സഫീര്‍ അധ്യക്ഷനാകും.