കൊല്‍ക്കത്ത: ഐ ലീഗ് കിരീടത്തിനുള്ള പോരാട്ടം ഫോട്ടോ ഫിനിഷിലേക്ക്. ഇന്നലെ നടന്ന മത്സരത്തില്‍ മിനര്‍വ പഞ്ചാബിനെ ഒരു ഗോളിന് പരാജയപ്പെടുത്തിയതോടെ ഈസ്റ്റ് ബംഗാളിന് വീണ്ടും കിരീട പ്രതീക്ഷയുണ്ടായി. മത്സരം സമനിലയില്‍ അവസാനിക്കുകയാണെങ്കില്‍ ചെന്നൈക്ക് കിരീടം നേടാമായിരുന്നു. എന്നാല്‍ 75-ാം മിനുട്ടില്‍ എസ്‌കോഡയുടെ ഗോളിലാണ് ഈസ്റ്റ് ബംഗാള്‍ വീണ്ടും കിരീടം സ്വപ്നം കണ്ടത്. ഒന്നാം സ്ഥാനത്തുള്ള ചെന്നൈക്ക് 40 പോയിന്റും രണ്ടാം സ്ഥാനത്തുള്ള ഈസ്റ്റ് ബംഗാളിന് 39 പോയിന്റുമുണ്ട്. ഇരു ടീമുകള്‍ക്ക് ഓരോ മത്സരവും ബാക്കിയുണ്ട്. ചെന്നൈ സിറ്റി സമനില നേടുകയും ഈസ്റ്റ് ബംഗാള്‍ ജയിക്കുകയും ചെയ്താല്‍ കപ്പ് കൊല്‍ക്കത്തിയിലേക്ക് കൊണ്ടുപോകാം. ചെന്നൈ സിറ്റി പരാജയപ്പെടുകയും ഈസ്റ്റ് ബംഗാളിന് സമനിലയും വന്നാല്‍ ഇരു ടീമിനും 40 പോയിന്റാകും. ഇങ്ങനെ വന്നാല്‍ ഹെഡ് റ്റു ഹെഡ് മികവില്‍ ചെന്നൈക്ക് കിരീടം ഉയര്‍ത്താനാകും. മാര്‍ച്ച് 9 നാണ് നിര്‍ണായകമായ രണ്ട് മത്സരങ്ങളും നടക്കുന്നത്.