കോടഞ്ചേരി: കഴിഞ്ഞദിവസങ്ങളില്‍ പെയ്ത കനത്തമഴയില്‍ നെല്ലിപ്പൊയില്‍ സെന്റ് തോമസ് എല്‍.പി സ്‌കൂളിലെ വര്‍ഷങ്ങള്‍ പഴക്കമുള്ള കിണര്‍ ഇടിഞ്ഞുതാഴ്ന്നു. ഇതോടെ സ്‌കൂളില്‍ കുടിവെള്ളമില്ലാതായി. 180 വിദ്യാര്‍ഥികളാണ് സ്‌കൂളിലുള്ളത്. രണ്ടു പമ്പ് സെറ്റുകളും ആള്‍മറയും കിണറിന് ചുറ്റുമുള്ള കോണ്‍ക്രീറ്റ് സ്ലാബുകളും കിണറിനൊപ്പം ഇടിഞ്ഞുതാണു. 12 മീറ്ററോളം ആഴമുള്ള കിണറില്‍ നിറയെ വെള്ളവുമുണ്ടായിരുന്നു. 27 െ്രെടബല്‍ വിദ്യാര്‍ഥികള്‍ സ്‌കൂളിലുണ്ട്. ഇവര്‍ക്ക് മൂന്നുനേരം ഭക്ഷണം സ്‌കൂളില്‍നിന്നാണ് പാകം ചെയ്തു നല്‍കുന്നത്. ഇതോടൊപ്പം മറ്റു വിദ്യാര്‍ഥികള്‍ക്കുള്ള ഉച്ചഭക്ഷണവും പാകം ചെയ്യാന്‍ സ്‌കൂളില്‍ വെള്ളമില്ലാതായി. ജല അതോറിറ്റിയുടെ വെള്ളത്തില്‍ മാലിന്യം കലര്‍ന്നതായി സ്‌കൂള്‍ അധികൃതര്‍ പറഞ്ഞു. ഇപ്പോള്‍ വെള്ളത്തിന് അയല്‍വീടുകളെയാണ് ആശ്രയിക്കുന്നത്.