കൊച്ചി: കേരളത്തില്‍ സ്വകാര്യ മേഖലയിലെ ആദ്യ വിമാന നിര്‍മാണ കമ്പിനി പാലക്കാട്ട് ആരംഭിക്കുന്നു. സുക്കുണ്‍ഫിറ്റ് ഇന്ത്യ ഏവിയേഷന്‍ ആന്റ് സ്‌പേസ് റിസര്‍ച്ച് ടെക്‌നോളജി പ്രൈവറ്റ് ലിമിറ്റഡ് എന്നപേരിലാണ് കമ്പനി പ്രവര്‍ത്തനം തുടങ്ങുന്നത്.

ഉക്രയിന്‍ കേന്ദ്രമായി പ്രവര്‍ത്തിക്കുന്ന അന്താരാഷ്ട്ര കമ്പനിയുമായി ചേര്‍ന്നാണ് പാലക്കാട് കിന്‍ഫ്രാ പാര്‍ക്കില്‍ പ്രവര്‍ത്തനം ആരംഭിക്കുക.

ചെറുകിട വിമാനങ്ങളും അവയുടെ സ്‌പെയര്‍ പാര്‍ട്‌സുമാണ് ഇവിടെ നിര്‍മിക്കുക. വിനോദ സഞ്ചാര മേഖലയില്‍ ഉപയോഗിക്കുന്ന സീ പ്ലയിന്‍ പോലുള്ള ചെറിയ വിമാനങ്ങളും സുഖോയി പോലുള്ളവയുടെ പാര്‍ട്‌സുകളും ഇവിടെ നിര്‍മിക്കും.

കിന്‍ഫ്രായിലെ ഡിഫന്‍സ് പാര്‍ക്ക് ഉദ്ഘാടനം ചെയ്യുന്നതിനൊപ്പം കമ്പനിയുടെ പ്രവര്‍ത്തനവും ആരംഭിക്കും. എയര്‍ക്രാഫ്്റ്റ് നിര്‍മാണത്തിനൊപ്പം എയര്‍ ക്രാഫ്റ്റ് രൂപകല്‍പന, ഗവേഷണം എന്നിവയ്ക്കും അവസരമൊരുക്കും.
കമ്പനി തുടങ്ങാനുള്ള എല്ലാ സര്‍ക്കാര്‍ അനുമതിയും നേടിയെന്നും ഡയറക്ടര്‍ ധീരജ് നമ്പ്യാര്‍, ഐശ്വര്യ സന്തോഷ് എന്നിവര്‍ വാര്‍ത്താസമ്മേളനത്തില്‍ അറിയിച്ചു.